Read Rongmei Naga KALUMLU 91 Bible Online

KALUMLU 91 - Rongmei Naga bible

KALUMLU 91

¹Thow pwni RINGHPOUC khou duploupui mei, Ngamparymeipu rui gaekloumei bangc khou bampui mei rui,

²“Nang hei ata gaekloumeipu khatni makavloumeipu e. Nang hei aRacguangc e; nang khou ai lwm e,” twna kakhou sa puni.

³Kalam thu kamei rui nang ta meickai phac khou rui khatni ravpyan rihpyan khou rui kanduaklou puni.

⁴Kaswkaeng rui nang ta gungcbinlou puni; kamei rui kadanloumei lungc khou nang tinggiu makna bam puni; suai makmeipu kamei rui nang ta gaeklou puni.

⁵Zingbangc rav rih ta nang ping khang maek khe; kalaanv suc-rih ta ping dat khang maek khe

⁶zingh khou ni gaanh khou ni, meic swluai tatmei ravpyan ta ping lak khe.

⁷Nang daeng khou meic ching theic bam nuh e; ching ruh nang daeng theic bam nuh e; tiki nang ta tikabiu lak ge.

⁸Akumhna meicsimei nunc ta dandi tii bu cho twmei nang mik rui how puni.

⁹Nang RINGHPOUC khou duplou the, Kauh Liangmeipu khou nang bam the.

¹⁰Kumna tasiat chari akhat na rui sini nang ta sw kasic lak ge, sw kasic karoucmei akhat na sini nang kai daeng guang tuanc lak ge.

¹¹Nang tatloupui bamv kathuic khou gaeklou khang, Ravguangc rui katuang baanchara ndiulou puni.

¹²Nang phay ntauh khou kabiu mak khang baanchara nunc baanc rui nang ta zaylou puni.

¹³Kanin simei kamangliangpui nunc ta nang rui nii bin puni, kakhay tanhmei ruigam ta bacbin puni.

¹⁴Ravguangc rui sa e, “Ata nzianmei nunc ta ai rui kanlou puni, ata RINGHPOUC e twna laamei nunc ta ai rui gaeklou puni.

¹⁵Kaniw ata kaw pwkhou ai dawlou puni; kaniw ryanra bam pwkhou ai kaniw daeng khou bamna nkhavlou puni. Ai rui kaniw ta kanlou puni khatni chakhwang swlou puni.

¹⁶Kaniw panty ai rui zay saengclou puni; ai rui kaniw ta kanlou puni.”