Read Rongmei Naga KALUMLU 94 Bible Online

KALUMLU 94 - Rongmei Naga bible

KALUMLU 94

¹He RINGHPOUC, nang hei nkhuaimei ta dandi tiimei Racguangc e; nang lungpuam lyanlou o!

²Thaulou o, he Kandihmei Latzanpouc; daihriw swmei nunc khang hei dandi tiilou o.

³He RINGHPOUC, meicsimei nunc asaanh zaenggay bam nina cho?

⁴Meic biw meic dowmei nunc tei asaanh kadai sw bam nina cho? Kaniw tuang simei taanv khang kaniw gaengh sw bam nina cho?

⁵He RINGHPOUC, kaniw rui nang mei nunc ta sw kasiclou the; kaniw rui nang mei nunc ta rai the.

⁶Kaniw rui maypui nunc khatni nruna nunc ta swluai e khatni aniw kandic khou lungc bammei gin nunc ta swluai e.

⁷“Ravguangc aniw ta how bam mak ge; Isarael Racguangc thay bam mak ge,” kaniw rui sa e,

⁸Amei nunc, nangniw akumhna heidi mpang bam tu cho? Tabui nungc rui nangniw kabah thay nina cho?

⁹Nu damcloumeipu hei chu pw lakna cho? Mik damcloumeipu hei how pw lakna cho?

¹⁰Zaatc nunc ta riaploumeipu hei rui nangniw ta thu riaplou pw lakna cho? Dincloumeipu kamei hei thay pw lakna cho?

¹¹Kaniw kakhanh bammei tei RINGHPOUC thay e; kaniw kakhanh bammei tei adih mpang cho twmei kamei thay e.

¹²He Ravguangc, nang rui riaploupui mei tei, nang rui kakhou nang latdyn dincloupui mei tei adih sangay cho!

¹³Meicsimei nunc khang khunh chaulou mak saanv, ryanramei tingmik guay khou rui kata tizaengthaekclou e.

¹⁴RINGHPOUC rui kamei nunc ta ganclou mak ge; kamei guay ta mpatlou mak ge.

¹⁵Latzankai guay khou nzihmei nai dat puni, ravchaptatmei guay rui hei tei machuang puni.

¹⁶Thow rui meicsimei nunc hu khou hei akhangv dinglou ni? Simei taanhmei nunc ruc khou thow rui abiak liangclou ni?

¹⁷RINGHPOUC rui ata nkhavlou mak khwan e thei, ai hei rimh rimmei dic thangc bam kan ni tuang the.

¹⁸“Ai bow key bam the,” twna ai kakhanh khwan e; tiki he RINGHPOUC, nang ata taek makna nzianlou bammei paan rui ata zay thaulou the.

¹⁹Ai lungh geic kadanna bammei ganv kathuic nang rui ata swmlou e, khatni tineihlalou e.

²⁰Mphuammei latzanpouc nunc ta nang khat sini nuh mak ge; nzih makmei ta ti-nzihloumei nunc, meicgaymei nunc ta sw kasic khang mbincna swmei nunc,

²¹khuay maekmei ta theih khang latzan tiipatmei nunc ta nuh mak ge.

²²Tiki RINGHPOUC rui ata ding gaeklou e; aRacguangc rui ata gaeklou e.

²³Kamei rui kaniw ta dandi tii puni, kaniw tuang kheihsimei khang tei, kaniw paap guay khang tei, kaniw ta swmutlou puni. RINGHPOUC aniu Racguangc rui kaniw ta swmutlou puni.