Read Rongmei Naga KALUMLU 95 Bible Online

KALUMLU 95 - Rongmei Naga bible

KALUMLU 95

¹Guang o, Aniu RINGHPOUC ta thuanc kho! Ravguangc, aniu ta Gaekloumeipu khou aniu neihlana suan kho!

²Aniu thuanckuna, thuanhpui lu neihlana suanna kahu khou guang kho!

³Kalam thu RINGHPOUC hei daihmei Racguangc e, rav guay ruc khou daic liangmei guangc e.

⁴Kamei kandih kapwm ta sin bam e, kandih bangc khou rui kauh liangmei chyng twan nganv sin bam e.

⁵Kamei rui damcloumei duipui ta kamei sin bam e; kamei kahak rui damcloumei kandic ta sin bam e.

⁶Guang o, aniu nkhum keyna kata kalum kho; aniu ta Damcloumeipu RINGHPOUC mav khou tangkhungh key kho!

⁷Kamei hei aniu Racguangc e; aniu hei kamei rui gaengclou bammei nunc e, kamei rui makuat bammei lauziu pang e. Kamei rui samei aseic nking o:

⁸“Nangniw pupouc nunc Meriba khou sw kanmei tei kumc, kaniw Massa tuang tazikramv khou sw kanmei tei kumc, nangniw lung tanh rio.

⁹Ai rui kaniw khang taancloumei taanv how khwan sini, mi khou tei kaniw ata nchanv e.

¹⁰Tingkwm 40 ai mi meikin ta tei karaeng khwan e. ‘Kaniw hei adih meic biang guang mak tu cho! Kaniw alatdanv guay piu mak ge,’ twna ai sa kan the.

¹¹Alungpuamcna, ‘Ai rui nangniw ta zaeng ti nthaekclou nimei bamv khou tei nangniw ta tigut lak khe,’ twna tanhmei latdyng ding kan the.”