Read Rongmei Naga KALUMLU 96 Bible Online

KALUMLU 96 - Rongmei Naga bible

KALUMLU 96

¹RINGHPOUC khou luthanh suan o! He kandih kapwm, RINGHPOUC khou suanlou o! RINGHPOUC khou suanlou o, kata thuanc o!

²Kamei rui aniu ta kanloumei gaychamv hei, tingmik kathuic kauc ndauh o.

³Kahym zaatc nunc khou kauc ndauh o, katuang tancbauhmei taanv guay zaatc guay khou raclou o.

⁴RINGHPOUC hei daic e, kata thuanc kauhna thuanc nina e; kata rav baihmei ta suangc champouh nina e.

⁵Zaatc baihmei nunc rav guay thu ravmaengc de; tiki RINGHPOUC rui tingpuk kasiamhlou e.

⁶Hymdaihmei khatni chingkhiuhmei kahu khou padik ge; pumtan khatni howgaymei katuang Ravkai padik ge.

⁷He kandih maansei guay, RINGHPOUC ta thuanc o; kahym khatni kapumtan ta thuanc o!

⁸RINGHPOUC tuang hymdaihmei zanc thuanc o; puatkat phungcna katuang Ravkai khou guang o.

⁹RINGHPOUC ta katuang nthanmei khou kalum o Kamei pat pwkhou, He kandih kapwm, kamav khou ping kadunh o!

¹⁰“RINGHPOUC hei guangh e! Kandih ta kabamv khou ntipna lou the kumna kalung mak khe; kamei rui zaatc guay ta nzihna latzan sw puni,” twna zaatc guay khou sa o.

¹¹He tingpuk kandih neihla o! Duipui khatni nang khou naimei khouringh katana rah thau o!

¹²Ramvpuk guay khatni nang khou naimei katana neihla o! RINGHPOUC rui kandih sin khang guang pwkhou, nwmbangc khou thing bang guay neihlana kauc puni.

¹³Kamei rui nchumhna khatni khaksi khaklangh makna kandihmei zaatc guay ta sin puni.