Read Rongmei Naga KALUMLU 98 Bible Online

KALUMLU 98 - Rongmei Naga bible

KALUMLU 98

¹RINGHPOUC khou lu thanh suanlou o; kabaanzat rui khatni katuang nthanmei baancpwam rui charynmei taanv mpeyna taanclou the. Kamei rui rih ngamlou the.

²RINGHPOUC rui rih ngamlou the twmei kauc pat kan the; kamei rui kanloumei pumtan kamei rui zaatc nunc khou tithaylou kan the.

³Kamei rui Isaraelmei ta taek makna nzianlou bam e, kalatdyng amuc zat mak ge. Aniu Racguangc rui rih ngamloumei tei kandih tin tou nganv how kan the.

⁴He kandih kapwm, RINGHPOUC khou neihlana suan o; lu suanna kata thuanc o; neihlana kaucna thuanc o!

⁵RINGHPOUC ta thuancna suan o! Nuh gaymei nrac zayna thuanc o!

⁶Bianggun lev ziuhchei amuanna thuanc o; RINGHPOUC aniu Racguangc khou neihlana kauc o!

⁷Duipui ni kauc thau tho, duipui khou bammei khouringh katana thuanc o; kandih khatni kandih khou bammei katana thuanc o!

⁸Duidai guay ni baanh hiw o; chyngbut guay ni neihlana RINGHPOUC mav khou suan kariu o.

⁹Kalam thu kamei mbaanv ta sin khang guang the. Kamei rui kandihmei zaatc guay ta khaksi khaklangh makna nchumhna sin puni.