Read Rongmei Naga LATKWDYN 1 Bible Online

LATKWDYN 1 - Rongmei Naga bible

LATKWDYN 1

¹Mi hei Isaraelmei guangc David nac mpouh Solomon tuang latkwdyn e:

²Mi khou rui ningting khatni latdyn gaymei laatow puni, khatni kabah nthukmei latkw latrou thay puni.

³Ningtyng ntakna, lungning nthanna kachap ntwnna, khatni nchumhna lungh khang mi hei rui nchamlou puni.

⁴Mi guay rui mpangmei ta ti-ntaklou puni, khatni chabwan nunc ta tiningtynglou puni.

⁵Ningtyngmei nunc khou ningting haaplou puni, thaymei nunc khou sinsw thay khang dinclou puni.

⁶Mi latkw guay hei rui latkwdyn tuang nthukmei kabac guay khatni nyngtyngmei nunc tuang latgyam thay khang dinclou puni.

⁷Ravguangc ta pingmei hei ningting bangbi e. Mpangmei nunc rui ningtyng laa nii mak ge, khatni nchamloumei ta thouh swlou mak ge.

⁸Anacle, nang pui nang pu rui nchamloumei tei piu o.

⁹Howgaymei pykha khatni ntuh rui nang lwn kapuihmei tei kumcna, nang pui nang pu rui nchamloumei tei rui nang kheiliak kasiamhlou puni.

¹⁰Anacle, meicgay makmei nunc rui khanv pwkhou nuhlou la rio.

¹¹“Aniu meicdow tat kho! Kakhuay maekmei nunc ta swluai tat kho!

¹²Taruaih kumcna, khatni khunh khou kaduai key kan kumcna kaniw ta nringhric swluai kho!

¹³Asut guangmei lanv rui aniu kai lou padik puni the!

¹⁴Asut guangmei puat guay tei aniu nzanh kho,” twna nthiam pwsini anacle nuhlou la rio.

¹⁵Mi kumhmei nunc tei lev tat kariu riu. Kaniw khou rui ducna bam o.

¹⁶Simei taanh khang kaniw nkhwan liat lak ge. Kaniw swluai swtiat khang kaganv thuic chamdaanv bam e.

¹⁷Nruayna rui how takhaanvna zauc bam khou phah zawloumei tei nsa de.

¹⁸Tiki mi kumhmei nunc tei thu, kaniw rui zawloumei phac khou kaniw rana mancluai puni.

¹⁹Kwamtumei nunc hei kaniw tuang taanv rui kaniw panty swmaan e; simei taanv taanhmei nunc tei kaniw panty mi kumna maanlou e.

²⁰Nking o! Ningting rui chaengdai chaengdai khou, khatni kaithyan bamv bamv khou kauc bam e.

²¹Kaidai raengcmun guay khou khatni meic guang kariupui bamv bamv khou kauc ranvna mi kumcna kauc bam e:

²²“Mpangmei nunc! Nangniw asaanh mpang bam ni hena cho? Ningting ta nangniw asaanh sinnui bam ni hena cho? Nangniw kabah thay zat lak hena cho?

²³Ai rui nangniw ta luh bammei hei nking o; ai rui nangniw khou latdyn gaymei dinclou puni. Khatni ai rui nangniw khou ningting tiilou puni.

²⁴Akhou guang o twna ai rui nangniw ta kaw bam e, tiki nangniw chulou mak ge, khatni nangniw lungh gutlou mak ge.

²⁵Alatdyn guay ta nangniw thouh swlou mak ge, khatni ai rui nangniw ta sw ntwnlou khang samei lat ta nangniw laalou mak ge.

²⁶Mi zaeng rui nangniw ryanramei khou keylou pwkhou, ai nangniw ta nuiclou puni. Tasiat chari nangniw ruc khou guang pwkhou, ai zaucna nuic puni.

²⁷Pingmei pwanzingh kumc, nangniw khou guang pwkhou, swkamut kamaimei pwansav karai kumc guang pwkhou, nangniw ryanra chwnswna bammei ganv khou tei, ai rui kachuina nuiclou puni.

²⁸Mi khou kiu nangniw ningting ata kaw puni, tiki dawlou lak ge. Nangniw ata kabamv kathuic khou phubam nuh e, tiki ata phutow lak ge.

²⁹Nangniw ningting laa nii zat makmei nunc e, khatni Ravguangc lat piu zih bammei nunc e.

³⁰Nangniw alatdyn ta kahaw zat mak ge, khatni ai rui nangniw ta sw ntwnlou khang sw pwkhou thouh swlou mak ge.

³¹Mi zaeng rui, nangniw taanv thai nangniw laa puni, khatni nangniw taanv guay rui nangniw ta tiryanra puni.

³²Ramhthay makmei nunc tei ningtyng ta laalou zihpui zaeng rui theic puni. Mpangmei nunc tei kadan thay makpui zaeng rui theic puni.

³³Tiki alat piumei kathuic tei simei ariw lak ge. Kaniw giuga makna, ping tuang maekna lungc bam puni.”