Read Rongmei Naga LATKWDYN 10 Bible Online

LATKWDYN 10 - Rongmei Naga bible

LATKWDYN 10

¹Mi hei Solomon tuang latkw nunc e: Ningtyngmei nac rui kapu ta tineihlalou e; mpangmei nac rui kapui lung tiryanralou e.

²Nthan makmei lanv rui nang khang gaengmei nai ni tu hamh e; tiki ravchaptatmei rui nang ta theic nimei khou rui kanlou puni.

³RINGHPOUC rui meicgaymei nunc ta ti-ndaapclou ni tu hamh e; tiki meicsimei nunc ta ti-nkow nkanghlou puni.

⁴Aliauhmei rui tilungcsilou e; tiki taanc ranvmei rui nang ta tilungcgaylou puni.

⁵Kathai luakpui ganv khou luakloupui mei tei ningtyngmei e; tiki lautay ganv khou zip bammei hei meiczakpui tuang e.

⁶Meicgaymei rui suaihiam laatow puni; tiki meicsimei mwang khou sw kasic karouc nimei tuang nkamh padiklou bam e.

⁷Ravchaptatmei ta ningtowmei hei suaihiam e; tiki meicsimei nunc zanc mu amuc nuangc kan puni.

⁸Ramh ningtowmei nunc rui gaymei latdyn ta laalou e. Mpangna sa bammei tei maan kan puni.

⁹Kalung nthanmei nunc tei simei ariw makna lungc bam e; tiki kalung nthan makmei nunc ta tei nym pat puni.

¹⁰Nchumhmei ta sa pat makna rylou bammei rui ryanramei tipat re; tiki ndawna luhmei rui chuzaengh khang taanclou e.

¹¹Meicgaymei mwang tei ringhmei duipuakckai e; tiki meicsimei mwang khou sw kasic karoucmei tuang padik nai e.

¹²Karaengmei rui agay agimei tipat re; tiki nzianmei rui khuay guay gumbinlou e.

¹³Ntakpui mei rui ningtyngmei lat sa e; tiki mpangmei nunc khang builwang kage nai e.

¹⁴Ningtyngmei rui ngammei kamv ningting khuamlou e; tiki mpangmei rui sa pwkhou sw kasic karoucmei khou na nai e.

¹⁵Lungcgaymeipu ta katuang lanv rui gaeklou e; lungcsimeipu ta lungcsimei rui swmutlou e.

¹⁶Ravchaptatmei thai thu ringhmei e; tiki paapc rui paapc khou mbu hay hayna zaylou e.

¹⁷Kaniw ta ti-ntwn khang ncham bammei ta nking bammei nunc tei ringc puni; tiki kaniw ta nkhuai tw tilaa zihmei nunc tei simei khou keylou puni.

¹⁸Kamei karaeng zauczihmei tei nkamh bampui mei tei saraamhmei e. Nsuc nrauc tat bampui mei tei mpangmei e.

¹⁹Sa geiclou paapc taanc geiclou the. Kamwang kakym thaypui mei tei ningtyngmei e.

²⁰Meicgaymei tuang lat guay tei nthanmei kachaekc kumc tuang e; meicsimei chwn tei thu laalou nuhmei khat sini maek ge.

²¹Meicgaymei tuang lat tei thu meic mpeyna khang gaeng puni; tiki mpangmei thu karampang rui kata swluai e.

²²Lungcgaymei hei RINGHPOUC tuang suaihiam e. Taanc ranvmei na rui nang ta tilungcgaylou ngam mak ge.

²³Nkhuaimei taanv taanc nii bammei tei mpangmei e; ntakmei nunc rui ningting ta kahawna phu e.

²⁴Ravchaptatmei nunc khang kaniw rui kahawna huayneymei tiilou e; tiki meicsimei nunc khang kaniw rui ping liangmei tei kaniw ruc khou keylou puni.

²⁵Pwanzingh guang pwkhou meicsimei nunc ta phungc ganc e; tiki kalung nthanmei nunc thu kabiu kabaeng zat makna bam e.

²⁶Aliauhmei ta nang taanvtaanh khang laalou la riu, kamei rui nang huc khang zoukhiangc kumc khatni nang mik khang maikhou kumc puni.

²⁷RINGHPOUC ta ping o, kum e thei nang panty lungsingna lungc puni. Meicsimei nunc tei kaniw panty tangh makna theic e.

²⁸Meicgaymei nunc neihlamei laatow puni; tiki meicsimei nunc rui lwmgay bammei tei nsa khang de.

²⁹RINGHPOUC rui kalung nthanmei nunc ta gaeklou e; tiki simei taanhmei nunc ta swmut re.

³⁰Ravchaptatmei nunc ta phuay ganc lak ge; tiki meicsimei nunc ta mi kandic khou tilungc bam lak ge.

³¹Ravchaptatmei nunc rui ningtyngmei lat sa e; tiki latsic samei baley guay tei dan ganc puni.

³²Ravchaptatmei nunc rui laalou nuhmei lat sa pat re; tiki meicsimei nunc thu meic lung tikabiu nimei lat rana sa e.