Read Rongmei Naga LATKWDYN 11 Bible Online

LATKWDYN 11 - Rongmei Naga bible

LATKWDYN 11

¹Nchumh makmei duh sinmei nunc ta RINGHPOUC karaeng e. Nchumhna guanmei tei RINGHPOUC kahaw e.

²Daihriw swpui mei nunc tei zakmei ariw puni; niamhmei hei ningtyngmei e.

³Nchumhmei nunc ta kaniw tuang lungh nthanmei rui zaylou e. Lwm nuh makpui mei ta tei katuang lungh nthan makmei rui swmutlou e.

⁴Nang theic nimei tingmik khou thu lanv rui nang khang ramhkhat na sini swlou dat ngam mak khe; tiki lungh nthanmei rui nang panty kanlou nuh e.

⁵Lungh nthanpui mei thu kapanty khou amanvna lungc puni; tiki meicsimei ta katuang simei tei rui sw kasic puni.

⁶Kalung nthanpui mei ta katuang ravchaptatmei rui kanlou e; tiki lwmlou nuh makpui mei tei thu karana tuang agaamvmei phac khou manc e.

⁷Meic sipui mei tei theic pwkhou katuang rigwnmei tei kamei lev theic nchamc e. Lanv khou lwmloumei tei ramhkhat sini gaeng mak ge.

⁸Ravchaptatpui mei ta ryanramei khou rui kanlou e; tiki mi tuang ryanra tei meicsimei khou keylou dat re.

⁹Rav ta thay makpui mei latsav rui nang ta sw kasic nuh e; tiki ravchaptatpui mei tuang ningting rui nang ta kanlou nuh e.

¹⁰Kalung nthanmei nunc lungcgay thau pwkhou kaidai tei neihla e, khatni meicsimei nunc theic pwkhou neihlana kauc e.

¹¹Ravchaptatmei nunc tuang suaihiamloumei kaidai tei daic thau e; tiki meicsimei nunc lat rui hei tei swmaan e.

¹²Meic baihmei ta malana luhmei hei mpangmei tuang taanv e. Nang si gay thaymei e thei reih reina bam puni.

¹³Meickai pary rac tanhpui mei nunc khou tei nkamhpui lat dinclou nuh mak ge; tiki lwmlou nuhpui mei nunc khou tei nang tuang nkamhmei tei dinclou nuh e.

¹⁴Chaengzayloumei maek pwkhou zaatc akhat tei bowmei tuang e. Dincloumei geihmei khou tei si suai nimei khou rui duak ge.

¹⁵Nang zentelmei pow khang dinglou e thei, nang lung ryanra puni. Nang mi khou tei kazauh mak ge thei, nang khang gay puni.

¹⁶Zauzian thaymeipui ta chakhwang champouh swlou puni; tiki kagunc maekmeipui tei malapui tuang e. Aliauhmeipu tei syanlanv nai zat ni tu hamh e;

¹⁷Zauzian thaypui mei tei kakhang gaeng e; zauzian thay makpui mei tei karana kata sw kasic e.

¹⁸Meicsimei nunc kalingna ramhkhat sini gaengmei laatow mak ge; tiki nang nchumhmei taanc e thei, nang suai makna kathai laatow puni.

¹⁹Nchumhmei taanh khang ding ntip bammei nunc tei ringc puni; tiki simei taanh khang karamc bampui mei tei theic puni.

²⁰Simei taanh khang lunghlou bammei nunc ta tei RINGHPOUC karaeng e; tiki nchumhmei taanhmei nunc ta tei nzian e.

²¹Meicgay makmei nunc ta dandi tii puni twmei nang thay o; tiki ravchaptatmei nunc tei dandi khou rui duak puni.

²²Lwnchav gay ki chakhiw chakhei thay makmeipui tei guakluh nukwang khou kachaekc tadip thaengcloumei kumh tuang e.

²³Meicgaymei nunc rui taanc ni twna ningmei taanv guay tei gaymei taanc pat re; meicsimei nunc rui kaniw rui kahawmei tei laatow pw khou meic kathuicna lunghpuamc e.

²⁴Meic gaanvsaekc kaniw lanv nsa tiipat re kumna lungcgay hay hay thau e; tiki gaanvsaekc thu tanthih e, tiki lungcsi ranv ranv key e.

²⁵Nang baanc daic o, kum e thei nang lungc ku puni. Meickai ta nkhavlou o, kum ti thei nang ta nkhavlou puni.

²⁶Nap-bi naina nkamhlou bampui mei ta tei meic nunc rui sianglou e; tiki hei tei zuanc pat bammei nunc ta tei suaihiamlou e.

²⁷Gaymei ta phupui mei khang tei gaymei swlou puni, simei ta phupui mei khang tei simei guanglou puni.

²⁸Katuang lanv khou ngangvlou bammei nunc tei chakaanvmun khou thingnuy tang kumc tang puni; tiki ravchaptatmei nunc tei lauphwnswan thingnuy kazik kasatc kumc kasatc thau puni.

²⁹Kakai kaikhunc ta tikatuakc bammei nunc tei thei thangc kaniw khang ramhkhat sini nai ni tu hamh the. Mpangmei nunc tei ningtyngmei nunc bangc sw puni.

³⁰Ravchaptatmei rui tilungc chuylou e; bumaengh khuampui mei tei ningtingmei e.

³¹Meicgaymei nunc khang mi kandic khou ni swan tiilou e; kum e thei meicsimei nunc khatni paapcmei nunc ta dandi tii nimei hei suai dat lakmei lat re.