Read Rongmei Naga LATKWDYN 12 Bible Online

LATKWDYN 12 - Rongmei Naga bible

LATKWDYN 12

¹Ningting kahawmei nunc thu kaniw khuay dincloumei ta kahaw e. Ncham ntwnloumei ta laa zihpui mei tei mpangmei e.

²Meicgaymei nunc ta RINGHPOUC nzian e; tiki simei raeng raengc bammei nunc ta swmaan puni.

³Simei taanv rui simei tiguang e; tiki ravchaptatmei nunc thu kachac lak ge.

⁴Now gaymei hei kagaanv zaw e; tiki kagaanv ta tizak bammei now tei thu rou khou nchiatrav naimei kumh tuang e.

⁵Ravchaptatmei nunc tuang raeng thu nchumhmei e; tiki meicsimei nunc tuang latdyn thu meicguatmei tuang de.

⁶Meicsimei nunc lat guay tei meic theic nimei tuang rana de; tiki ravchaptatmei nunc lat rui theic suc nimei khou rui kanduaklou e.

⁷Meicsimei nunc bowkey kan the, kakikta sini ganclou duh mak khe; tiki ravchaptatmei kaikhunc guay thu kalung makna bam e.

⁸Ntakmei ta meic thuanc e; mpang e thei meic nunc rui mala puni.

⁹Meicdaihmei thak sw lana ndaapcna bammei suangc, meic nthyammei swna taanc lana bung nggu bammei rui gay e.

¹⁰Meicgaymei nunc rui katuang khouringc khounac ta nganv kungcna sw e; tiki meicsimei nunc thu kaniw tuang ta nganvna nzian thay mak ge.

¹¹Taanc ranvmei laumei tei kabung khang gaat dat mak khe; tiki gaeng lakmei taanv khou kaganv swmaan bammei hei mpangmei e.

¹²Meicsimei nunc rui phu bammei kiu simei taanv taanctow khang twmei hei e; tiki ravchaptatpui mei thu ding ntip bam e.

¹³Meicsimei tei karana kalat khou manc e; tiki kalung nthanpui mei tei ryanramei khou rui duak ge.

¹⁴Nang lat theilayna nang taanvphy laa puni; kataanv kataanv tei kakhou guanglou datmei tuang de.

¹⁵Mpangmei nunc rui kaniw sw bammei tei nchumh de twna ning e; tiki ningtyngmei nunc thu nchamloumei ta nking e.

¹⁶Mpangmei tei kaningsum lyan nuangc e. Ningtyngmei tei sa kasicmei ta thouhswlou mak ge.

¹⁷Latling sapui mei rui nchumhmei sakhi tii e; tiki saraamhmei sakhi swmeipu rui meicguatmei lat sa e.

¹⁸Kakhanh makpui latsav rui baengsaeng rui biw kumc biw nuh e; tiki ningtyngmei latsav rui tigaylou e.

¹⁹Saraamhmei thu tingsaengh mak ge; tiki nchumhmei mu tingsaeng nai bam puni.

²⁰Simei taanh khang sw bammei nunc lung khou meicguatmei nai e; gay khang sw bammei nunc khou tei neihlamei nchu-nzaenghmei nai e.

²¹Ravchaptatmei nunc khou simei guanglou mak ge; tiki meicsimei nunc khang ryanramei rui padik ge.

²²Saraamhmei nunc ta RINGHPOUC karaeng e; tiki kaniw lat ngaekmei nunc ta kamei kahaw e.

²³Ningtyngmei nunc tei thay sini thay makmei lwn sw e; tiki mpangmei nunc tei kaniw rampang kauc lyan e.

²⁴Alinghpui mei rui kaipouc swna sin puni; aliauhpui mei tei bangh sw puni.

²⁵Lungh geihmei rui neihlamei swmaan e; tiki nzianmei latsav rui tineihlalou e.

²⁶Ravchaptatpui mei rui kapammei ta chaengzaylou e; tiki meicsimei nunc rui kaniw chaeng rui zay mbianghlou e.

²⁷Aliauhpui mei tei kamei karamc bammei tei laatow ni tu hamh e; tiki alinghpui mei tei mphang puni.

²⁸Ravchaptatmei hei ringhmei chaeng e; tiki meicsimei hei theic nimei chaeng e.