Read Rongmei Naga LATKWDYN 13 Bible Online

LATKWDYN 13 - Rongmei Naga bible

LATKWDYN 13

¹Ningtyngmei nac tei kapu rui nchamloumei ta laalou e; tiki daihlung phunghpui mei tei thu luhmei ta nkinglou mak ge.

²Meic gaypui mei tei kamei rui sa patmei gaymei lat swan kamei laa puni; tiki meicguatmei nunc tei thu swbak swruap khang tei rui ndaapc tarina bam e.

³Kamwang sinriap thaypui mei tei kapanty ta kan e. Kamwang katuanpui mei tei karana ta sw kasic e.

⁴Aliauhpui mei tei kamei adihkamv kahaw bam sini, kamei kahawmei tei laatow ni tu hamh e. Taanc ranvpui mei tei kamei kahawmei guay laatow e.

⁵Kalung nthanmei nunc saraamhmei ta karaeng e; tiki meicsimei nunc latsav guay thu meiczakmei tuang e.

⁶Nthanpui mei ta nchumhmei rui gaeklou e; paapc rui meicsimei ta swbow key e.

⁷Meic gaanvsaekc rui ramhkhat na sini maekna lungcgaypui thak sw e; gaanvsaekc rui lungcsimei thak swna kalanv peic padiklou e.

⁸Lungcgaypui mei tei kapanty katuang lanv rui liu bam nuh e; tiki lungcsimei thu ping khang maek ge.

⁹Ravchaptatmei nunc karangna gaanc bam e; tiki meicsimei nunc thu maibungc amit keymei kumh tuang e.

¹⁰Daihlung phunghmei rui latlu tiipat re. Dinclou khang thanvmei hei ningtyngmei e.

¹¹Chiwna laamei lanv tei chiwna maan puni; kungcna ntaanvloumei lanv rui mbu thaumei tuang de.

¹²Lwmgaymei tei guang tangh mak pwkhou lungh kabiu e; tiki kahawmei tei guang tangclou pwkhou neihlamei padik ge.

¹³Latdyn gaymei ta laalou zihpui mei tei ryanramei ney bam tu e. Hei tei piu o kum e thei nang ryanramei ariw lak ge.

¹⁴Ningtyngmei rui nchamloumei lat guay tei ringhmei duipuakckai e; hei tei rui nang ta theic nimei phac khou rui zay duaklou puni.

¹⁵Ntakpui mei ta chakhwang champouh swlou e; tiki lwmlou nuh makpui mei tei maan nimei chaeng khou tat bam e.

¹⁶Ningtyngmei nunc thu taanc nimei taanv taanc thau mak khou kakhanh rey e; tiki mpangmei nunc tei kaniw rampang ndauh e.

¹⁷Meicgay makmei latdiutatmei nunc rui ryanramei tiipat re; tiki lwmlou nuhmei nunc rui chuzaenghmei phungc guang e.

¹⁸Nchamloumei ta thay makmei nunc tei lungcsimei khatni zawsimei ariw puni; ncham ntwnloumei ta chuloumei nunc ta tei chakhwang champouhlou e.

¹⁹Kahawmei puat tei laatowmei hei adih neihla cho! Mpangmei nunc tei simei khou rui mpaan pat zih e.

²⁰Ningtyngmei nunc ta nduangh e thei ningtyng puni; mpangmei nunc ta nduangh e thei nang ta swmutlou puni.

²¹Paapcmei nunc thei ryanramei suic tat bam e; tiki ravchaptatmei nunc swan thu lungcthaumei e.

²²Meic gaypui mei tei katou kanac nunc khang nganv kalanv ganclou ngam puni; tiki paapcmei nunc tuang lanv tei ravchaptatmei nunc khang e.

²³Ramtan laupuk khou rui lungcsimei nunc khang nap-bi geicna tipat re; tiki nchumh makmei taanv taanhmei nunc rui mi ramvpuk tei titaanh mak ge.

²⁴Kanac ta riap makpui mei tei kanac ta nzian makpui mei e; kanac ta nzianpui mei tei kasiamh ntwnlou puni.

²⁵Ravchaptatmei nunc tei kabung ngguna lungc puni; tiki meicsimei nunc tei ndaapcna lungc puni.