Read Rongmei Naga LATKWDYN 14 Bible Online

LATKWDYN 14 - Rongmei Naga bible

LATKWDYN 14

¹Ningtyngmeipui rui kakai kasiamh thau e; tiki mpangmeipui rui kabaanc kahak rui kakai thaek ra e.

²Kalungning nthanpui mei tei RINGHPOUC ta pingmei e; tiki kachaeng mbianghpui mei tei kata thouhsw makmei e.

³Mpangpui mei tei kalatsav rui kanam khou builwang kaw guang e; ningtyngmei rui kalat rui kata gaeklou e.

⁴Lautaanhmei guaih maek ge thei nap maek ge; guaichic pumtan khou rui nap geih tuang e.

⁵Latling samei sakhi rui saraamc zat mak ge; tiki saraamhmei sakhi rui saraamhmei rui kalat sw e.

⁶Sinnuimei thu ningting phu bam sini phutow ni tu hamh e.

⁷Mpangmei nunc khou rui ducna bam o; kaniw rui nang khou nchamlou khang ramhkhat sini maek ge.

⁸Ntakmei nunc tei kaniw ningting rui kaniw taanc nimei taanc lak nimei kalwn thay e; tiki mpangmei nunc ta kaniw rampang rui guat re.

⁹Mpangmei nunc thu paapc taanc la sini lungh geih mak ge; tiki meicgaymei nunc thu kuakloumei ta laa nii e.

¹⁰Nang tuang neihla tei nang rana tuang de; nang tuang nkhucmei tei ni nang rana tuang de. Hei tei meic gaanv khat na rui sini kadam laa nchamclou ni tu hamh e.

¹¹Meicgay makmei nunc kai swkamut kamailou puni; tiki meicgaymei kai thu daic thau puni.

¹²Nang rui nchumhmei chaeng e twna ningmei tei rui nang ta theihmei khou zaylou nuh e.

¹³Kapaengc khou nuicna kalungc khou lungh ryanra bam nuh de. Neihlamei tat kan pwkhou, lungh ryanramei thu nai bam duc e.

¹⁴Meicgay makmei nunc tei kaniw taanv thai kaniw mphang puni; meicgaymei nunc khang ni kaniw taanv thai tii puni.

¹⁵Mpangpui mei rui ramh guayna ta lwm e; tiki ningtyngpui mei rui kakaamv kathuic zauc chuyna tat re.

¹⁶Ningtyngmei nunc tei ntak nrakna simei khou rui ley duc tat re; tiki mpangmei nunc thu kakhanh makna chadi chadana taanc e.

¹⁷Kalung puamc tanhmei nunc tei mpangmei taanv taanc e; ningtyngmei nunc reih reina bam e.

¹⁸Ramhthay makmei nunc tei kaniw rampang khang biuhmei tei laatow e; tiki ningtyngmei nunc khang ningting tiilou e.

¹⁹Meicgay makmei nunc tei ravchaptatmei nunc hu khou nkhumkey puni; meicsimei nunc tei ravchaptatmei nunc khou zauc nzianlou khang ney puni.

²⁰Lungcsimei ta thu kakai kainingmei rui nganvna nzian mak ge; tiki lungcgaymeipu thu kapam geic e.

²¹Kaining kaigeimei ta malamei hei paapc be; lungcsimei ta nzianmei hei sangaymei e.

²²Nang rui gay khang taanc ti thei meic nunc rui nang ta lwm puni khatni chakhwang swlou puni; nang rui si khang taanc e thei nang taanc laanh the.

²³Taanvtaanc no, kum e thei nang bung nggu puni; dungcna mwang na rui rac bammei rui lungcsimei khou zaylou puni.

²⁴Ningtyngmei nunc khang lanv tiilou e; tiki mpangmei nunc ta kaniw rampang rui thay e.

²⁵Kaling samei sakhi rui meic nunc panty kanlou e; saraamhmei sakhi tei thu meicguatmei de.

²⁶RINGHPOUC ta pingpui mei tei kamei khatni kakai kaikhunc tei lungh geic dat khang maek khe.

²⁷Nang theihmei khou rui duak nii bu cho? RINGHPOUC ta pingmei hei ringhmei duipuakckai e.

²⁸Guangh khat ramdai tei kamei meic azuh tuang guangc cho twmei khou tei nai the; katuang mei maek e thei kamei ramhkhat na sini hamh e.

²⁹Lunghpuamc nzaengpui mei tei ningtyngmei e; lunghpuamc katumcpui mei tei mpangmei e.

³⁰Lungning amanvmei rui pumh tigaylou e; tiki mamavmei hei rou khou nchiatrav naimei kumh tuang e.

³¹Lungcsimei nunc ta sintuna lungc bampui mei tei, damcloumei Racguangc ta tizak bam tuang e; tiki lungcsimei nunc khou zauc nzianloumei hei Ravguangc ta champouhmei tuang e.

³²Meicsimei nunc thu kaniw tuang simei taanv rui kaniw rana kaniw ta sw kasic e; tiki meicgaymei nunc ta kaniw lung nthanmei rui gaeklou e.

³³Ningting hei ntakpui mei lung khou tei nai e; mpangmei nunc rui ningting lam khou ramhkhat na sini thay mak ge.

³⁴Ravchaptatmei rui zaatc ta tidaiclou e; paapc rui zaatc zaw swkasicmei tuang e.

³⁵Ramh ngammei bangc ta guangh nunc rui pianlou e; tiki chuy makmei bangc ta dandi tii e.