Read Rongmei Naga LATKWDYN 16 Bible Online

LATKWDYN 16 - Rongmei Naga bible

LATKWDYN 16

¹Maansei rui karaeng raengc e; tiki taanc pat nimei thu Ravguangc khou rui e.

²Maansei rui kamei taanhmei guay tei nchumh e twna ning bam nuh e; tiki Ravguangc rui thu lungning tei latzan swmei tuang de.

³Nang rui taanc nimei guay tei RINGHPOUC khou tiilou o; kum e thei hei tei guang tangc puni.

⁴RINGHPOUC rui kasiamhloumei kathuic nganvlou nimei bamv nai e; khatni meicsimei nunc tuang tangclou nimei bamv thu maanmei e.

⁵Daihriw swmei kathuic ta RINGHPOUC karaeng e; kaniw ta dandi tii makna mpatlou lak ge.

⁶Latpiu chuymei khatni lwmlou nuhmei sw o; kum e thei Ravguangc rui nang paap kuaklou puni. RINGHPOUC ta pingna lungc e thei, simei khou rui duak puni.

⁷Nang rui RINGHPOUC ta tipianna lungc pwkhou, nang ta zauczihmei nunc ta nganvna nang lev nchu-nzaenghmei tinailou dat puni.

⁸Lungh nthanna katit na ntaanv guangmei tei rui, mphuamna mpeyna ntaanv guangmei suangc gay e.

⁹Maansei rui kamei taanc nimei ning bam nuh e; taanc pat nimei thu Ravguangc rui dinclou e.

¹⁰Guangh tei ravngamv kazauhna lat sa e; katuang latzan tei nkhuai mak ge.

¹¹Duh khatni ndatryan tei nchumhna sinmei ta RINGHPOUC kahaw e, buanh ni kalingmei ta kahaw e.

¹²Guangh rui simei taanv ta khaengv bam ngam mak ge; kalam thu nchumhmei rui kaguangcdic titanclou tuang e.

¹³Nchumhmei lat samei ta guangh chu nii e; nchumhmei lat samei guay ta kamei nzian e.

¹⁴Ningtyngmei rui guangh ta tineihla bam khang karamc e; guangh lungpuam hei meic theic nimei tuang e.

¹⁵Guangh zauzian hei lauphwnswan khou ting phungc guangmei muangcbangv tei kumc e; mi khou tei ringhmei nai e.

¹⁶Ningting takh laatowmei hei daandi kachaekc laatowmei suangc gaeng e.

¹⁷Meicgaymei nunc tei simei khou tatlou makmei chaengdai tei tat re; kumna nang tat nimei chaeng tei ramhthayna tat re thei ringc puni.

¹⁸Daihriw swmei rui swkamut kamaimei khou zaylou e; khatni ramhkhe swmei rui tibow e.

¹⁹Meicngam meicliammei nunc rui asut guangmei tei nzanh tu bammei suangc, nthyammei swna lungcsi bammei rui gay e.

²⁰Nchamloumei ta laaloupui mei tei lungcku puni; RINGHPOUC khou lwmloupui mei tei sangaymei e.

²¹Ningtyngmei meic phamei swkanpui mei ta tei ntakmei e twna chak ge. Nuh gaymei latsav sa thay lou, meic nunc rui nang lat laalou geic lou puni.

²²Ningting hei ningtyngmei nunc khang ringhmei duipuakkai e; tiki mpangmei ta ncham thaylou khang karamhmei hei kaganv swmaan khang de.

²³Ningtyngmei nunc rui kakhanhna sa e; kaniw rui sa patmei lat tei meic laa nii e.

²⁴Nzianmei latsav hei nkhuaihdui kumc e; meic lung khang ndeih e, meic pumc khang gay e.

²⁵Nang rui nchumhmei chaeng de twna kakhanhmei chaeng tei rui theihmei khou zaylou nuh e.

²⁶Ndaapcmei tei rui maansei ta taanv titaanc ranvlou e; kalam thu kabung ndaapcmei tei kamei ti nggulou nii e.

²⁷Meicgay makmei nunc rui meicgaymei ta sw kasic nimei chaeng phu bam e; kaniw latsav nganv maibwang kumc e.

²⁸Meicgay makmei nunc rui lat lu tipat re; nsuc nraucmei rui rupryan swbak ge.

²⁹Meic nzimei nunc rui kaniw rupryan nunc ta guat re; kumna kaniw ta maanmei khou zaylou e.

³⁰Nang khou mik kakhip bammei khatni kachy khaic bin bammei nunc ta tei zauc chuy o; kaniw ramhkhat simei kakhanh bam e.

³¹Panty lungsingmei hei ravchaptatmei nunc tuang swan e; pypuangh samngauh hei hymdaihmei pyrun e.

³²Tancbauhmei khang suangc khaengvthaymei rui gay e. Kaidai ta sin ngammei suangc nang rana nang ta sinriap ngammei hei gay e.

³³Ravguangc chwn thanvna meic nunc rui san zauc e; tiki hei tei Ravguangc nyng de.