Read Rongmei Naga LATKWDYN 17 Bible Online

LATKWDYN 17 - Rongmei Naga bible

LATKWDYN 17

¹Khumngai kumc tu zangvna agay agina lungc bammei suangc, ntyan kang na sini tuna chuzaenghna lungc bammei gay e.

²Ningtyngmei bangcpu rui mpangmei kakaipouc nac mpouh ta sin puni, khatni katampy laa nzanh puni.

³Daandi kachaekc ta mai rui nchanv e; maansei lung ta RINGHPOUC rui nchanv e.

⁴Meicgay makmei nunc rui gay makmei lat nking nii e, khatni saraamhmei rui saraamhmei lat nking nii e.

⁵Nang lungcsimei nunc ta nuic e thei, kaniw ta damcloumei Racguangc ta nang sinnui bam tuang e. Meic gaanvsaekc sansimei khou nang neihla e thei, nang ruc khou dandi keylou makna taan lak ge.

⁶Alauc nunc kaniw pupouc nunc ta zaucna gaenghswmei kumc, karacpouc nunc kaniw tou nunc ta zaucna gaenghsw e.

⁷Champouhlou nuhmei nunc tei saraamc sa mak ge, khatni mpangmei rui meic laalou nuhmei lat sa pat mak ge.

⁸Lanvbiwmei puat hei manguipu kumh tuang e; mi rui taanc ngam tu rana e twna meic gaanvsaekc rui ning e.

⁹Meic nunc rui nang ta nzianmei ta laa nii e thei, kaniw rui nang khou nkhuailou pwkhou kuaklou tio. Nkhuaimei ta ningtow bammei rui duangda sw ntamv e.

¹⁰Mpangmei ta bai liang 100 tina thaymei suangc, ntakmei ta luh guai tina thaymei mbu e.

¹¹Sw katuakc katit bammei meicsimei nunc khou tei theihmei rui meic nzimei chamvphunghmei kumc guang puni.

¹²Mpangmei taanv khou tyn bammei mpangmei ta ariwmei suangc, kanac nym ngam kanmei chagamh kui ta ariw kanmei rui gay e.

¹³Gaymei taancloumei khang simei khangcloupui mei tei kakai khou rui simei tat pat dat zat pw lak khe.

¹⁴Agay kahouh thaumei hei zeih phak patmei kumh tuang e; ranv thau mak khou thingclou o.

¹⁵Meicsimei ta ti-nzihloumei, nchumhmei ta ti-nkhuailoumei; mi kanei ti hei RINGHPOUC karaeng e.

¹⁶Mpangpui mei rui syan keyna ningting ntaanv bammei rui gaengmei tuang maek ge; kalam thu kakhou thay nuhmei ningting maek ge.

¹⁷Duangda thu nzian tanh tan e. Chana hei khat khat ryanra phungc nkhav khang puanclou tuang e.

¹⁸Mpangpui mei na rui meickai pow phaan dinglou puni.

¹⁹Agay niimei hei paapc ta kahawpui mei rui e. Kasyan kalanv khang kagaengh lyan bampui mei tei kamut kamaimei ta phu bam tu e.

²⁰Kalung sipui mei tei daic thau ngam lak ge; kabaley guatpui mei tei ryanramei khou keylou puni.

²¹Mpangmei nac mpouh hei kapu lung ryanra khang di the; mpangmei nac puanc patloumeipu tei neihlamei maek ge.

²²Lungh neihlamei twmei hei puc gaymei e; lungh ryanramei rui meic pumc tisuan e.

²³Meicgay makmei latzanpouc nunc rui nkamhna lanvbiwmei laa tuna nchumhmei taanh mak ge.

²⁴Ningtyngpui mei tei ningtyngmei taanv taanh khang tamc e; tiki mpangmei nunc mik thu kandih pwm ruan lik sik ge.

²⁵Mpangmei nac mpouh thu kapu lung tikabiu khang e; kapui lung tiryanra khang e.

²⁶Nkhuai makmei ta ti-matkhapmei hei gay makmei tuang e; meicgaymei ta baimei hei nkhuaimei taanv e.

²⁷Kamwang sinriap thaypui mei tei ningtyngmei e; reih reina bampui mei tei ramhthaypui mei e.

²⁸Mpangpui mei ta sini reih reina lat sa makna bam ti thei, ningtyngmei e twna ning e.