Read Rongmei Naga LATKWDYN 18 Bible Online

LATKWDYN 18 - Rongmei Naga bible

LATKWDYN 18

¹Meickai ta nduangh nuh makpui mei tei kakhang na ningmei e; meic baihmei rui nchumhmei e twna samei tei kamei nuh ni tu hamh e.

²Mpangpui mei tei kamei kabah thay niimei tuang maek ge; kamei kahawmei kiu kamei ningmei na tei sa bammei tei e.

³Paapc thei zakmei lay guang e, khatni nang gunc maan e thei malamei lay guang e.

⁴Meic gaanv khat latsav tei duipui syng saanv nthukmei, duithuak dui kumc nthanmei ningting duipuakckai sw bam nuh e.

⁵Nkhuaipui mei ta zauc nzianlou, khatni nkhuai makpui mei khou nchumhmei swlou mak twmei hei nchumh mak ge.

⁶Mpangpui mei rui kamwang rui karuc khou latlu tipat re; kabaley rui zamv ney guang e.

⁷Mpangpui mei rui kamwang rui karana kata sw kasic e; kamei kalat khou manc e.

⁸Nsuc nraucmei lat hei gan tugaymei kumc e; meicna zou tukey tangc e.

⁹Aliauhpui mei hei swkamut kamaipui mei chana e.

¹⁰RINGHPOUC hei tanhmei rihgaekkai e; ravchaptatmei nunc mi khou tei giuga makna bam e.

¹¹Kauhmei, tanhmei raengc rui kaidai ta gaekmei kumc, lanv rui kaniw ta gaek ge twna lungcgaymei nunc rui ning e.

¹²Daihlung phunghpui mei tei mut key puni; niamhmei ta tidaic thaulou puni.

¹³Nking reyna mundaw o. Kum mak ge thei, nang rampang lyan bam tuang e, khatni nang zaw sw kasic bam tuang e.

¹⁴Nang tuang ringc niimei chwn tei rui nang sucnu keypui ganv khou nkhavlou ngam puni; tiki nang khou hei tei maan kan e thei, rigwnmei baihmei nai dat mak khe.

¹⁵Ntakmei nunc rui ningting ta thay nii chu niina phu e.

¹⁶Saengc daihmei nunc ta ariw nii e thei kaipat phungc guang tithei ariw chiw e.

¹⁷Latzan bamv khou tei gaanv khat tei rui sa dat mak saanv thu, sa reymeipu rui nzih tu kumc e.

¹⁸Ngamv naimei gaanv nei rui latzan kai khou ding dac pwkhou, san zauhmei rui lat tei luailou nuh puni.

¹⁹Chana rui nkhavmei hei tanhmei kaidai kumh tuang e; tiki agaymei hei raengh kaikhamv mbanghmei kumh tuang e.

²⁰Nang mwang rui salou kanmei thai tei nang laa puni.

²¹Nang rui sa pat kanmei lat tei rui nang ta tiringc nuh e, hamh e thei titheic nuh e; kumna nang rui salou kanmei thai tei nang laa nina e.

²²Now laatowmei hei ramh gaymei laatowmei tuang e; Ravguangc zauzian laatowmei tuang e.

²³Lungcsimeipu thu meickai khiuzaeng laana huaycha e; tiki lungcgaymeipu rui ngam samna daw e.

²⁴Duangda gaanvsaekc thu tingsaengh mak ge; tiki duangda gaanvsaekc thu chana suangc ni nzian diangc e.