Read Rongmei Naga LATKWDYN 19 Bible Online

LATKWDYN 19 - Rongmei Naga bible

LATKWDYN 19

¹Mpangna saraamhpui mei sw bammei suangc, lungcsina lungh nthanmei sw bammei rui gay e.

²Thay makna lungh gutmei hei gaeng mak ge; chadi chada e thei ryanramei ariw puni.

³Maansei karampang rui kata swkasiclou lana, RINGHPOUC khou nkhamlou e.

⁴Lungcgaymei nunc khang kaganv thuic duangda thanh ariw e; tiki lungcsimei ta thu kapam rui nganvna ganclou e.

⁵Nang latzankai khou saraamc ti thei, nang ta dandi tii puni; duak datpui chaeng nai lak ge.

⁶Saengc daihmei nunc rui nzianloumei ta meic kathuicna phu e; nzianlouthaymei nunc ta meic kathuic duang khang khanv e.

⁷Lungcsimei ta thu kachana nunc rui nganv karaeng e, kapam karai maek ge; kapam karai khang kasang patna phu bam sini phu pat mak ge.

⁸Ningting laatowpui mei tei karana kata nzianpui mei e; kamei thayloumei tei rylouna bampui mei tei daicthau puni.

⁹Latzankai khou saraamhpui mei gaanv khat na sini dandi khou rui duak ngam mak e; saraamhpui mei tei maan puni.

¹⁰Mpangmei nunc lungc talehna lunghmei hei biuh makmei kumc, bangh rui kaipouc ta sinmei biuh mak ge.

¹¹Ningtyngpui mei rui kalungpuam sinriap ngam puni. Meic gaanvsaekc rui nang khou nkhuailou pwkhou, hei tei thouhswlou makmei tei gunhdaihmei akhat re.

¹²Guangh lungpuam hei kamangliangpui nin kumc e; tiki kazauzian hei ramh bwan khou zikdui keylou kumc e.

¹³Mpangmei nac rui kapu ta sw kasic e. Agay tanhmei now hei kai tingzowmei kumc e.

¹⁴Meic akhat rui kapui kapu khou rui kai khatni syan lanv laa nuh e; tiki RINGHPOUC na rui ningtyngmei now tiilou tuang e.

¹⁵Nang aliauh nii e thei aliauh bam o, zipna ni bam o; tiki nang ndaapcna lungc puni.

¹⁶Ravguangc latdanv guay piu o, kum e thei nang ringc saengc puni; piu makmei guay theic puni.

¹⁷Lungcsimei nunc khang tiiloumei hei RINGHPOUC khang tiiloumei tuang e; RINGHPOUC rui khangclou dat puni.

¹⁸Alaucna ncham nuhpui ganv khou, nang nac nunc ta kasiamh o; kum mak ge thei kaniw rana kaniw ta swmaan khang nang rui nkhavlou bam tuang e.

¹⁹Thowkumhmei kalungpuam si e thei, mi thai tei kamei laa kan diu. Nang rui kata ryanramei khou rui laa patlou guai e thei, nang hei tei sw dat nina di he.

²⁰Dincloumei ta nang nking nii e thei khatni nchamloumei ta laalou e thei, neih khat thu nang ningtyngmei sw puni.

²¹Meic nunc rui chamvraeng mpeyna raengc bam nuh e; tiki RINGHPOUC rui chwnmei na tei guang tangc puni.

²²Taektw agaamv agahmei hei zakcpui tuang e; saraamhmei suangc lungcsimei rui gay e.

²³RINGHPOUC ta ping o, kum e thei nang ringc saengc puni, pianna lungc puni, simei khou rui duak puni.

²⁴Aliauhmei thu napkuak khou kabaanc nymlouna kamwang khou phalou khang nganv aliauh bam e.

²⁵Mpangmei nunc rui thay kan khang, daihlung phunghmei nunc ta dandi tii nina e. Nang ningtyng e thei, nang ta ncham ntwnlou bammei tei laalou puni.

²⁶Zak thay makmei khatni kazaw maekmei na rui kapu ta sina sw puni; hamh e thei kapui ta kakai khou rui alay ganc puni.

²⁷Anacle, nchamloumei nking taan e thei, nang thay kanmei tei sini thouhsw mak thau nuangc puni.

²⁸Sakhi rui thowkumhmei ta tikabiu khang ning kan e thei, mi bamv khou tei nzihmei maek khe. Meicsimei nunc simei taanv taanc nii e.

²⁹Mpangmei sinnuimei nunc tei suai makna kaniw ting khou builwang tu puni.