Read Rongmei Naga LATKWDYN 2 Bible Online

LATKWDYN 2 - Rongmei Naga bible

LATKWDYN 2

¹Anacle, ai rui nang khou nchamloumei hei laalou o, khatni ai rui nang ta taanc o twna samei tei amuc zat la riu.

²Ningting lat tei nking o, khatni hei tei kabah thay khang karamc o.

³Ngguay, thay khang ney o; howduhmei laatow khang huaycha o.

⁴Daandi khatni nkamhloumei lanv phu kumc, mi ti hei lakh gutna phu o.

⁵Nang mi kumcna phu e thei, RINGHPOUC ta pingmei twmei kabac kiu thay puni khatni Ravguangc ta thay puni.

⁶Ningting tiiloumei hei RINGHPOUC rui e; kakhou rui kabahthaymei khatni sigay thaymei guang e.

⁷Ravchaptatmei nunc, kalung nthanmei nunc ta kamei rui nkhavlou e khatni gaeklou e.

⁸Meic nunc khou nchumhna swloumei nunc khatni kakhou lunghlouna bammei nunc ta RINGHPOUC rui gaeklou e.

⁹Nang alat nking e thei, kachap ntwnmei, nchumhmei, zawkhu zawru zauh makmei kiu tabui tei cho twmei nang thay puni; nang taanc nimei, taanc lak nimei thay puni.

¹⁰Nang ningtyng thau puni kumna mi ningting paan tei rui amanvna lungc puni.

¹¹Nang khou naimei ningting khatni sigay thaymei tei rui nang ta gaeklou puni,

¹²akhatni nkhuaimei taanc nimei khou tei khaamlou puni, meic nunc rui kaniw thiw simei khou rui ryanra katuakcmei tiguang nimei khou tei rui gaeklou puni,

¹³ravchaptatmei panty ganclouna paapc zinghmei khou lungh khang tatkanmei nunc,

¹⁴nkhuaimei taanv taanh khang kahawmei nunc, khatni simei taanh khang neihlamei nunc,

¹⁵pat pat gut gutmei lung phunghmei nunc khatni kataanv simei nunc khou tei rui nang ta ti-mpaan patlou puni.

¹⁶Kamwangthyam gayna kakheiliak mphuammeipui nunc khou tei rui,

¹⁷kagaanv khou lwmnuh makmei, kamei rui swloumei latdyng nthukmei ta amucmeipui khou tei rui nang akhangv ngam puni.

¹⁸Nang mi kumhmeipui kai thangc tei tat re thei, nang theihmei chaeng tat bam tu e. Mi khou tei tat bammei hei taruaih nzwan tat bam tu e.

¹⁹Mi kumhmeipui ta guang ariw kanmei gaanv khat na sini hanc guang dat mak ge. Kamei ringc nimei chaeng khou hanc guang dat mak ge.

²⁰Mi zaeng rui nang meicgaymei nunc thei lay nzeih nina e khatni ravchaptatmei panty khou lungc nina e.

²¹Ravchaptatmei nunc, kalung nthanmei nunc tei mi kandic khou hei lungc bam puni.

²²Tiki Ravguangc rui meicsimei nunc ta mi kandic khou rui dow ganc puni khatni pucbwan ta kandih khou rui phuay ganh kumc paapcmei nunc ta mi kandic khou rui phuai ganc puni.