Read Rongmei Naga LATKWDYN 20 Bible Online

LATKWDYN 20 - Rongmei Naga bible

LATKWDYN 20

¹Zouh zangv geihmei hei rui nang ta mpang nlomei tisw e. Mi hei Mpangmei taanv e.

²Rah bammei kamangliangpui ta ping kumc, kalungpuamhmei guangc ta ping o; kalung tipuamhmei hei meic rana meic ta swluai bam tuang e.

³Mpangpui mei rui agay agi tanc e; chingkhiuhpui lanv kiu thu agay agi makmei hei e.

⁴Aliauhpui mei lausuakpui ganv khou suaklou mak ge; kumna taypui ganv khou tay khang maek ge.

⁵Maansei lung hei dui syng thangc naimei dui kumc tuang e; hei tei ningtyngmei na rui laa pat ngam e.

⁶Meic mpeyna rui ai thu lat piu chuymei e twna sa e; tiki lwm nuhpui mei ta thow phu pat ngam nina cho?

⁷Ravchaptatpui mei rui khanvbamv maekmei panty khou lungc e; kata luihmei kanac nunc tei sangaymei e.

⁸Guangh tei latzan khang dungc bam e; kumna kamei zauc pwkhou simei ta tei how patna ganc e.

⁹“Ai rui alung sw nthan the; ai paapc khou rui nthan the,” twna thow rui sa ngam puni cho?

¹⁰Nchumh makmei duh khatni nchumh makmei ndatryan sinmei ta RINGHPOUC karaeng e.

¹¹Alaucna rui nganv kataanv rui kamei thow cho twmei lyan e; kamei kalung nthan ny khatni meicgaymei ny nang sa ngam puni.

¹²How khang mik khatni chu khang nu RINGHPOUC rui aniu khang tiilou the.

¹³Kaganv zip maan riu; lungcsi lam e. Tynna bam o, kum e thei nang bung khang mphamh mphaahna nai puni.

¹⁴Ramh liumei nunc rui kamanv geic langv e twna sapui riak ge; tiki kamei laa tang e thei, kamei rui ndyn keyloumei manv khou tei kagaengh swna sapui riak ge.

¹⁵Kachaekc nai e, kamanv kunghmei tauc ni nai e; tiki ningting lat sa pat thaymei mwang tei kungc liangmei e.

¹⁶Zentelmei pow khang dingloumei mpangpui mei tei, mi pow khang tei katuang puat maanloumei hei biu rap be.

¹⁷Nthan makna laaguangmei puat tei tu gaymei nap gan kumc bam nuh e; tiki asaanh makna kamwang khou tausiamc pha padiklou kumc nuangc kan ni tuang de.

¹⁸Gaymei latdyn tei piu o, nang zawkauhmei ariw puni; ningtyngmei rui zaylou pwkhou rui rihngam tuang e.

¹⁹Kamwang thaymei nunc ramh nkamh ngam mak ge; lat sageic langvmei nunc ta nduangh riu.

²⁰Kapui kapu ta siangpui mei tei kapanty tei zingh khou maibungc amit kumc amit puni.

²¹Chiwna laatowmei lanv tei nang khang gaeng lak ge.

²²Nang khou nkhuailoumei lauguat tei nang rana khangh riu; RINGHPOUC ta nkhwan o, kamei rui nang ta nkhavlou puni.

²³Nchumh makmei duh khatni ndatryan sinmei nunc ta RINGHPOUC karaeng e.

²⁴Aniu tat nimei chaeng tei RINGHPOUC rui dinglou the; kum e thei akumhna thow rui pw ni kapanty chaeng tei thay ngam nina cho?

²⁵Nang rui Ravguangc khang puatkat tiipat nimei hu khou kakhanh mincna kakhanh o; katangv thangc nang lung ngiuc bam dat nuh e.

²⁶Ningtyngmei guangc rui nkhuaimei taanv taanhmei nunc ta nym pat puni; kumna zauzian maekna kamei rui dandi tii puni.

²⁷RINGHPOUC rui aniu khou lungning khatni si gay thaymei lung tiilou the; aniu rana khou rui aniu nkamh ngam mak ge.

²⁸Guangh tei kalung nthanna, nzianna, khatni guhsw gahsw makna sin bam saanv kangamv nai bam puni.

²⁹Chabwan nunc tuang hym kiu kaniw pumtan tei e; gaanvthaih nunc gunc kiu pypuangh samngauh tei e.

³⁰Riapmei zam rui aniu tuang simei ta sw nthan pat re; kagitmei rui aniu lungsyng nganv sw nthan tangc e.