Read Rongmei Naga LATKWDYN 21 Bible Online

LATKWDYN 21 - Rongmei Naga bible

LATKWDYN 21

¹Guangh lung tei RINGHPOUC baanc khou duiriang kumh tuang de; kamei rui zaylou nii nii thangc zaylou ngam e.

²Nang rui taanhmei guay tei nchumh de twna nang ning bam nuh e; tiki RINGHPOUC thu lungning tei latzan swmei tuang de twmei ningtow o.

³Nchumhmei khatni nthanmei taanv tei taanc o; hei tei khaengmei ta suangc RINGHPOUC kahaw e.

⁴Meicsimei nunc ta tei kaniw tuang daihlwn swmei khatni ramhkhe swmei rui sin e; mi hei paapc be.

⁵Alinghmei nunc tuang taanv thai mphamh mphaahna lungc puni; chadi chadamei thai thu biuc zat makna lungc puni.

⁶Kalung nthan makna laaguangmei lanv tei maan nuangc e; khatni hei tei rui theihmei khou zaylou e.

⁷Meicsimei nunc ta tei kaniw tuang simei taanv rui swmaan e; kalam thu kaniw nchumhmei taanc nii mak ge.

⁸Kakhuay naimei nunc nkhuai kadat kadaengvmei chaeng khou tat re; kakhuay maekmei nunc nchumhmei taanc e.

⁹Kareic simei now lev kai akhat na lungc khou lungc kariu bammei suangc, kainam khou lungc bam kanmei rui gay e.

¹⁰Meicsimei nunc tei simei taanh khang kaganv thuic ndaapc bam e; kaniw gaanv khat na khou sini zauc nzianlou mak ge.

¹¹Sinnui sinnumei nunc ta riaplou pwkhou mpangmei nunc ni thay pat re; ningtyngmei nunc tei thu nchamlou tina thay e.

¹²Nchumhmei Racguangc rui meicsimei nunc kai ta ni zauc bam e; kumna meicsimei nunc ta swmaan e.

¹³Lungcsimei nunc kapmei khwan nang nu nkatna chulou mak ge thei, nang kapmei tei ni chulou lak ge.

¹⁴Nang ta lunghpuamc bampui mei ta tei nang tuang nkamhna tiimei kaipat rui swm keylou ngam e.

¹⁵Nzihmei taanv taanc ti thei, meicgaymei nunc neihla e; tiki meicgay makmei nunc kaniw zaw zingc e.

¹⁶Kabah thaymei khou rui ruan duc tatpui mei khang tei theihmei nkhwan bam e.

¹⁷Nungngai amanvmei ta kahawpui mei tei lungcsi puni; zouh khatni tugay zangvgay ta kahawpui mei tei lungcgay lak ge.

¹⁸Meicsimei nunc tei kaniw rana rui ryanramei phungc guangna meicgaymei nunc ta ti ryanra khang karamc e.

¹⁹Kareic simei agay tanhmei now lev lungc kariu bammei suangc, meic lungh makmei tazikramv thangc lungc tat kanmei rui gay e.

²⁰Ningtyngmeipu kai khou kunghmei lanv nai e; tiki mpangmei rui kalanv guay tu ngam e.

²¹Zauzianthay o khatni lungh nthan o; kum e thei nang ringc saengc puni, meickai rui nang ta champouh puni khatni swchuylou puni.

²²Tancbauhmei rihmei nunc rui gaek bammei kaidai, kaniw lungthw sw bammei kaidai tei ningtyngmei ricpy rui lai ngam e.

²³Kamwang, kabaley sinriap thaypui mei tei ryanramei khou rui duak ge.

²⁴“Sinnuipui mei” twmei hei daihriw swpui mei zanc e.

²⁵Aliauh azihna taanvtaanh makpui mei tei karana kata swluai bam tw e;

²⁶Kamei laa khang na kakhanh bam e; tiki ravchaptatpui mei rui tiipat re, nzav tuang maek ge.

²⁷Meicsimei nunc rui khaengna tiimei ta RINGHPOUC karaeng e; simei lungning khou rui tiimei ta karaeng ranv e.

²⁸Saraamhpui mei lat ta meic lwm mak ge; tiki kakhanh lana samei lat tei laalou e.

²⁹Ravchaptatmei nunc rui thei hu zaucna taanc e; tiki meicsimei nunc thu ngammei kamv gaypui lwn sw e.

³⁰RINGHPOUC rui nuh makmei tei thu maansei ningting takh rui ramh sw dat ngam mak khe.

³¹Rih adow khang takuanh thu nang chamdaanvlou bam nuh e; rih ngamloumei thu Ravguangc rui de.