Read Rongmei Naga LATKWDYN 22 Bible Online

LATKWDYN 22 - Rongmei Naga bible

LATKWDYN 22

¹Lanv ta suangc zanh gaymei ta kahaw nina e; daandi kachaekc ta suangc nang gunc ta ning nthuk nina e.

²Lungcgaymei ni, lungcsimei ni Ravguangc rui damcloumei nchamc de.

³Ntakmei rui ryanramei guang nimei tei how rey lana mi khou tei rui ley duak puni; tiki kakhanh makpui mei thu mi khou tei sowlouna ryanramei ariw puni.

⁴RINGHPOUC ta pingmei khatni niamhmei swan thu lanv, champouhmei, khatni panty lungsingmei e.

⁵Meicsimei nunc chaeng khou thu sauh raengh khatni phah kih nai e; kabumaengc ta gaek thaypui mei tei meicsimei nunc khou rui ducna bam e.

⁶Alauc ta kamei tat nimei chaeng khou tei zaylou tio; kum e thei kamei daic thau pwkhou, mi khou tei rui tat pat dat pw lak khe.

⁷Lungcsimei nunc hei lungcgaymeipu bangc nunc e. Meickai pow phunghmeipu tei tipouloumeipu bangc tei e.

⁸Simei taanv taanc bammei nunc khou tei ryanramei keylou puni; kumna kaniw rui meickai ta rai bammei tei luai kan puni.

⁹Kalung daihpui mei ta suaihiamlou e; kalam thu kamei lungcsimei nunc lev tu zangv, nchamc e.

¹⁰Karana kata ningdaihpui mei khou rui rei duc tat ro; kum e thei agay agimei khatni khat khat ta swzakmei nai bam lak ge.

¹¹Lungh nthanmei khatni latgay samei ta kahawpui mei tei guangh ta kaduang sw puni.

¹²Saraamhmei lat guay tei laalou makna, nchumhmei tei tat keyna bam daih cho twmei RINGHPOUC zauc bam e.

¹³Aliauhpui mei rui kapaengc pat re thei kamangliangpui rui swluai pwng the twna kainung khou dup bam e.

¹⁴Nthah boulahmeipui mwang tei phah de; kaniw ruc khou RINGHPOUC lungpuam keyloumei nunc tei mi khou tei manc e.

¹⁵Alauc lung khou mpangmei duambinlou bam e; tiki riaploumei builwang rui hei tei kakhou rui ducna alay ganc e.

¹⁶Nang rui lungcgaymei nunc khang tii e thei khatni lungcsimei nunc ta sintuna lungcgay khang sw e thei, nang lungcsi key puni.

¹⁷Nking o, ningtyngmei nunc rui sa kanmei tei ai nang khou dinclou puni. Kaniw rui dincloumei tei kathai o.

¹⁸Mi guay tei nang lung khou rylou e thei, mi guay tei nang baley twan khou nai e thei, nang neihla puni.

¹⁹RINGHPOUC khou nang lwmlou kanmei ta ai laa nii e; mi zaeng rui mi guay tei ai ntaw nang khou salou nina e.

²⁰Ai nang khang latkwdyn 30 hykeylou the. Mi guay khou tei ningting khatni nchamloumei lat nai e;

²¹Kumna nchumhmei ling kiu tabui tei cho twmei nang khou dinclou puni. Kum pwkhou nchumhmei lat phu pat khang nang ta thouclou pw khou, nchumhmei lat nang phungc guang ngam puni.

²²Lungcsimei nunc ta tei lungcsimei e twna sintu riu; latzankai khou lungcsimei nunc ta niibin riu.

²³RINGHPOUC rui lungcsimei nunc latbamv tei sinthaulou puni; kaniw panty swmaan khang sw bammei nunc panty tei swmaan puni.

²⁴Lungpuam simei khatni kareic sipui mei ta duangda sw riu.

²⁵Nang kakhei layluaihna kalaic dat ngam lak bam lam e.

²⁶Meickai pow khang nang dinglou la riu.

²⁷Nang khangc ngam timak ge thei, kaniw rui nang laeng nganv laa kan puni.

²⁸Nang pu nangpouc rui lingcloumei ramvrei tei swkalaih riu.

²⁹Kamei rui taanhmei taanv tei taanc chuyna taanhmeipu ta how bu cho? Kamei tei guangh hu khou taanvtaanc puni; meic pang pangna hu khou taanc lak ge.