Read Rongmei Naga LATKWDYN 23 Bible Online

LATKWDYN 23 - Rongmei Naga bible

LATKWDYN 23

¹Saengc daihmei nunc lev tu zangv nchamc khang dungckey pwkhou, nang hu khou naimei tei zauc chuyna zauc o.

²Nang bung ndaapc sini khaengv o.

³Kamei rui tiipatmei tu gay nimei tei agaamv riu; hei tei rui nang ta guat khang sw bam nuh e.

⁴Lungcgay khang karamh khou rui nang pumc sw kasic mak khang ramhthay o.

⁵Nang tuang syan lanv guay tei kasw naina mouckauh kumc mikkhipdak khou rui samc maan kan kumc maan nuh de.

⁶Tanthihpui mei rui napkaw sini tu riu khatni kamei rui tiipatmei tu gay zangv gaymei tei tu nii riu.

⁷“Guangna tu geic tho,” twna kamei sa e, tiki tu changh kan khang hamh e. Kalung baic, kalat baic bam tuang de.

⁸Nang tulou kanmei tei nang ngguakc pat dat puni, khatni nang rui sathuancloumei tei nsa taan puni.

⁹Mpangmei khou latkw latrou salou riu; kamei hei tei kahaw thay mak ge.

¹⁰Reynungc tuang ramvrei swkalaic riu, khatni nkhu nruna nunc ramv asut riu.

¹¹Kaniw ta gaek bammeipu hei tanhmeipu de; kamei rui nangniw ruc khou lat sa puni.

¹²Nang ta nchamloumeipu lat tei lungh gutna nking o; kumna thay khang karamc o.

¹³Alauc ta riap khang rouh riu. Builwang rui kathamvmei rui theic ni tu hamh e.

¹⁴Nang rui kata builwang rui kathamvmei rui kata taruaih khou rui kanlou puni.

¹⁵Anacle, nang ningtyng thau pw e thei, ai neihla puni.

¹⁶Nang mwang khou rui gaymei lat sa pat pw e thei, alung neihla puni.

¹⁷Paapcmei nunc ta mamav riu; RINGHPOUC ta pingna lungc o.

¹⁸Kum e thei, nang khang thei dwan gayna nai puni.

¹⁹Nking o, anacle, ningtyng o khatni nang tat bammei chaeng tei kakhanh mincna kakhanh o.

²⁰Zouh zangv mbamei nunc khatni agaamv agahna tu zangvmei nunc ta nduangh riu.

²¹Zouh mbamei nunc khatni kabung hamei nunc tei lungcsi puni. Aliauhna zip bammei nunc tei pheyraan baanv puni.

²²Nang ta puanc patloumei nang pu lat tei nking o. Nang pui karacpeic key pwkhou, kata nzianpuilwn lyan o.

²³Nchumhmei, ningting, thaymei, khatni si gay thaymei; mi guay khang hei kamanv keyna liu biuc rap be; mi hei zuanc dat ri tho.

²⁴Ravchaptatmei puipu thu neihla bam khang nai e. Ningtyngmei nac puanc patloumei puipu tei thu kagaengh sw bam khang nai e.

²⁵Nang pui nang pu ta tineihla o; nang ta puanc patloumei nang pui zaeng tigaylou o.

²⁶Anacle, akhou lungh gutlou o, kumna athei lay nzeih o.

²⁷Kapumc zuanhmei nunc khatni kakhei mphuammei ntumei nunc hei theic nimei phac e.

²⁸Kaniw asut tumei nunc kumcna nchwan bam e; kumna nggaanvmei mpeyna ta lwm nuh makmei tiswlou e.

²⁹Thow cho ryanra zaengsi bammei? Thow cho lungh ryanra bammei? Thow cho agay agi bammei? Thow cho nsa zamv phungc bammei? Thow cho kamik zei kuna bammei?

³⁰Kaniw tei zouh khou lungh gutmei nunc the, tanhmei zouc zangvmei nunc e.

³¹Zouh buangc khou haengc karang bammei tei rui nthiammei khou tikeylou la riu.

³²Nkhamh khou hei tei nrui nchow kumc puni; ruigam khay kumc puni.

³³Nang mik khou baiclat baiclatmei how puni. Nang lung tei kakhanh ntwn ngam lak khe, lat katwn salou ngam lak khe.

³⁴Nang hei duipui khou bam tu kumc puni the; nang rungh duipui kamuatc khou zuang tat bammei kumc puni the.

³⁵“Ata kagit the, tiki zamh mak ge; ata bai the, tiki baimei ta ai thay mak ge. Tabui swna ai thau dat mak tu cho? Ai zangv dat puni he,” twna nang sa puni.