Read Rongmei Naga LATKWDYN 24 Bible Online

LATKWDYN 24 - Rongmei Naga bible

LATKWDYN 24

¹Meicgay makmei nunc ta mamav riu, khatni kaniw ta duang sw khang sw riu.

²Simei taanv taanh khang kaniw kaganv kathuic kakhanh bam e; kaniw mwang hah pat kan e thei meic gaanvsaekc ta thu sw kasiclou the.

³Ningting khatni si gay thaymei rui kai hei kasiamh thaumei tuang e.

⁴Ningting paan rui kai tei kamanv kunghmei khatni howgaymei lanv rui lou padik ge.

⁵Tanhmei suangc ningtyngmei rui gaeng e; ngguay, ningting hei pumtan suangc tanc e.

⁶Rih adow ni thei kaphianh chuy khang kage nai e, lat nthuihna laamei paan rui rihngammei tuang e.

⁷Mpangmei khang ningting hei kauh langvna kabah thay tangh mak ge. Peikai khou lat lu kaphianh thau pwkhou sa pat khang kakhang lat maek ge.

⁸Simei taanv taanh khang na raengc bampui mei ta tei sw katuakcpui mei twna kaw puni.

⁹Mpangmei rui kakhanh patmei raeng guay tei paapc de. Meickai ta luh na na bampui mei ta meic nunc rui karaeng e.

¹⁰Nang kunghmei ganv khou ramh sw ngam mak ge thei, nang suan changh tina the.

¹¹Nchumh makna swluai kan nina bampui mei ta kanlou khang rouh riu.

¹²“Hei tei ai thay mak ge,” twna nang sa bam nuh e; tiki maansei lung thaymeipu rui hei tei thay pw lakna cho? Kamei nang ta zauc bam e; kamei thay e. Kumna nang taanv thei layna kamei rui nang khang taanvphy tii puni.

¹³Anacle, nkhuaihdui tu o; mi hei tu gay e. Nkhuaih phic khou rui zow key rapmei khuaicdui baley khou ndeihmei ram ndei tei kumc,

¹⁴ningting hei nang bumaengc khang ndeih e twmei nang thay puni. Ningting laa o, kum e thei nang khang thei dwan gayna nai e.

¹⁵Lungh nthanpui mei tuang kwamtu khang, hamh e thei kakai ta lai tat khang raengc bammei meicsimei nunc tei kumh riu.

¹⁶Kalung nthanmeipu tei adih bow katupc bam sini, kamei thau dat dat re; tiki sw kasicmei rui meicsimei nunc ta swmut re.

¹⁷Nang ta zauczihmei bow key pwkhou, nang zaeng gay riu; kamei phaysuy pwkhou neihla riu.

¹⁸Nang nuihmei tei RINGHPOUC thay puni, khatni kamei hei tei kahaw mak ge; kumna zauczihmei ta tei dandi tii dat mak nuh e.

¹⁹Meicgay makmei nunc zaeng rui nang lung kabiu riu; kaniw ta mamav riu.

²⁰Meicsimei khang thei dwan maek ge; meicsimei tuang maibungc tei swmit puni.

²¹Anacle, RINGHPOUC ta ni, guangh ta ni ping o. Meicliammei pang khou kazauh riu.

²²Mi kumhmei mei nunc ti hei matat khat khou rui swmaanlou nuh e. Ravguangc rui, hamh e thei guangh rui tiryanra ryanriumei tipat nuhmei tei nang thay cho?

²³Ningtyngmei nunc rui mi guay hei ni salou e: Latzanpouc rui ning kasic reymei hei nkhuai e.

²⁴Kamei rui nkhuaipui mei ta kakhuay maek ge twna kauc pat tithei, kata meic kathuicna rui sianglou puni khatni karaeng puni.

²⁵Nkhuaimei ta dandi tiimei latzanpouc nunc tei daic thau puni, khatni kakhou suaihiam gaymei tiilou puni.

²⁶Lungh nthanna mundawmei hei duangda ling lyanmei tuang e.

²⁷Mpaeng taanv guay taanc luaina nang tuang laupuk nramh tangv khou rui kai sw thau o.

²⁸Kalam maekna meic gaanv khat ruc khou sakhi sw riu, hamh e thei kalam khou laa kadat nimei lat sa riu.

²⁹“Kamei rui akhou swloumei kumcna ai kakhou swlou dat puni; kamei rui taancloumei ai kakhou khangclou dat puni,” twna sa riu.

³⁰Aliauhmei, mpangmeipu tuang laupuk khatni drakha pikwan guay khou ai tat ruanlou khwan e.

³¹Mi bamv guay tei pucbwan, sauhbwan thau padik bam khwan e. Katuang ntauh raengc guay tei ni pangv key ngam bam khwan e.

³²Mi ta tei ai zaucna mi lam khou kakhanh khwan e, khatni mi khou rui ai laatow khwan e:

³³Tanguih nii e thei tanguih bam o; zip nii e thei ni zip bam o. Nang baanc pamcna nthaekc bam o.

³⁴Tiki buy-baeng sinmei kwamtumei nunc kumcna, nang zipri bam khou lungcsimei rui nang ta kwam puni.