Read Rongmei Naga LATKWDYN 25 Bible Online

LATKWDYN 25 - Rongmei Naga bible

LATKWDYN 25

¹Mi guay hei Judamei guangc Hezekiamei nunc rui hy haaploumei Solomon tuang latkwdyn nunc e:

²Aniu Ravguangc ta champouh e, kamei rui nkamhloumei khang tei rui, aniw guangh nunc ta champouh e, kaniw rui dinc nthanloumei khang tei rui champouh e.

³Tingpuk kauhmei kumc, duipui nthukmei kumc, guangh lung hei meic thay tangh ngam mak ge.

⁴Daandi khou rui nthan makmei guay tei laa ganc tio, kum e thei baanhthaymei rui howgaymei puat kasiamh pat puni.

⁵Meicsimei guay tei guangh daeng khou rui laa ganc kan o, kum e thei kaguangcdic tei nchumhmei khou rui daic thau puni.

⁶Nang guangh hu khou ding pwkhou, daihmei lwn sw riu.

⁷Nang bamv tei nang suangc daihmeipu khou tii khang samei suangc, kauh ranvmei bamv khou dungclou khang kaw pwmei rui gay e.

⁸Nang rui howloumei ramh lam akhat lam khou tei latzankai thangc tat nuangh khang sw riu. Sakhi baihmei akhat rui nang ta ti-nkhuailou e thei, nang tabui sw nina cho?

⁹Nang lev nang kainingmei kak khou lungh chamh mak tuang nai e thei, hei tei nangney kak khou sw nthan dat ro, khatni khat khat tuang nkamhmei tei rac ndauh tat riu.

¹⁰Kum mak ge thei nang hei ramh nkamh thay makmei e twna nang ta mala puni; kumna nang zakmei kanganv nai ni tu hamh the.

¹¹Sa cha rapna lat zat sa patmei latsav tei daandi paek khou kachaekc rui tingthai maengc hiakloumei tei kumc e.

¹²Ningtyngmei rui luhmei tei nking niipui mei khang kachaekc tadip suangc, gay liangmei kachaekc tuangc karuhpwan suangc kungc e.

¹³Lwmnuhmei latdiumeipu tei rui lautay ganv khou riu nchu keymei ting kumc, kakaipouc ta kachaengc tiringclou e.

¹⁴Katuang kaipat tiipat zat makna kamwang na rui tii ni twna sa bampui mei tei ting phungh makmei muangc kumh tuang de.

¹⁵Khaengv saenghmei paan rui guangh ta nthiam bow nuh de, mbuaihmei baley rui rou bau nuh de.

¹⁶Nang nkhuaihdui ariw sini, kabiuhna tu o; tu geic langv e thei, nruy lam e.

¹⁷Nang kai kainingmei khou tarailou katupc langv riu; kamei nang ta ningsumcna karaeng nuh e.

¹⁸Nkhuaina nkhamloumei hei baengsaeng kumc, thingdangv kumc, ntukmei pailu kumc meic theic nuhmei tuang e.

¹⁹Lwmlou nuh makmeipu khou, kunghmei ganv khou ngangvloumei hei meic huc kalakna ramh khaic thuy lak kumc, tan chuanchayna tat thuy lak kumc suangmav maek ge.

²⁰Lungh zingcna bampui mei khou lu suanloumei hei asikmei tingsei khou phey laa ganhmei kumc, zamv khou ntey thutlou kumc e.

²¹Nang ta zauczihmei rui ndaapc bam e thei titulou tio; kamei tari bam e thei tizangvlou tio.

²²Kum ti thei kamei kapy khou maithyn ruailou kumc zakmei rui khaengv ngam pw lak khe. Kumna RINGHPOUC rui nang khang swan tii puni.

²³Dihpy pwan rui suai makna ting phungc guangmei kumcna, nsuc nraucmei pary rui lungpuam tipat re.

²⁴Kara karing geihmei now lev kailungc khou lungc kariu bammei suangc, kainam thangc lungc bam kanmei rui gay e.

²⁵Duhmei kandic thangc rui gaychamv chumei hei tarina ruak phui bam khou duichu zangvmei kumh tuang e.

²⁶Meicgaymeipu rui meicgay makmeipu ta tigutloumei hei duithuak sw tanacloumei kumh tuang e, khatni duikhunc khou khay bunkeyloumei kumh tuang e.

²⁷Nkhuaihdui tu geic langvmei ni si e; hei tei kumcna thuancloumei ta kahaw geic langvmei si e.

²⁸Nang lungpuam ta khaam ngam mak ge thei, nang hei raengh maekmei kaidai, zauczihmei hu khou laanclou bammei kaidai tei kumh tuang e.