Read Rongmei Naga LATKWDYN 26 Bible Online

LATKWDYN 26 - Rongmei Naga bible

LATKWDYN 26

¹Lailum khou gunh keymei kumc, khatni lautay bw khou ting riumei kumc, champouhmei hei mpangmei khang ziap mak ge.

²Koureina samh kumc, pangraengna kaliapc kumc, syang hei kakhuay maekmei ruc khou thu keylou mak ge.

³Takuanh ta kathamv khang nai e, kuanniam mwang karak khang ni nai e, khatni mpangmei ta bai khang nai e.

⁴Mpangmei lat ta nang daw e thei, nang hei ni mpangmei de.

⁵Mpangmei latthanv khou tei mpangmei cham dawlou tio; kum timak ge thei kamei ningtyngmei e twna ning puni.

⁶Mpangmei khou lat titatmei twmei hei nang rana nang tan dan tu e, khatni ryanramei phu bam tu e.

⁷Mpangmei mwang khou latchap hei katan baumeipu tan ngwn tei kumh tuang e.

⁸Mpangmeipu ta thuancloumei hei paithw kumh tuang di the.

⁹Mpangmeipu rui ningting latchap samei hei, zouh mbameipu rui kabaanc khou sauh laa pat khang sw bammei riath re.

¹⁰Ariw riwmei mpangmeipu ta piuloumei hei meic guayna ta tiryanra tuang e.

¹¹Si rui nruy patna tu datmei kumcna, mpangmei rui katuang mpangmei taanv tei taanc kaluaih dat re.

¹²Mpang nlo liangmeipu tei, ningtyng makna ningtyng e twna ningmeipu tei suangc gay e.

¹³“Chaeng khou kamangliangpui nai e, chaengdai chaengdai khou kamang nai e,” twna aliauhpui mei rui sa e.

¹⁴Aliauhpui mei tei kalaeng khou na nkut bam e. Kaikhamv paek laanc pat nganvmei saan na tei sini tat pat mak ge.

¹⁵Aliauhmei thu kakuak khou kabaanc nymlouna, kamwang khou phalou khang nganvna aliauh e.

¹⁶Kaniw rui ningmei lam khou tei kalam gaymei mpeyna tii ngammei gaanv chanei suangc, kamei ningtyng e twna mpangmeipu tei kakhanh puni.

¹⁷Meickai agay bammei ta ariwna, kathouc hamh sini kazauhloumei tei, chaengdai khou patna si nu bianhmei kumh tuang e.

¹⁸Mbamei thiak swna theic nuhmei buy-baeng phianna bammeipu tei

¹⁹kaining kaigeimei ta chaengzay mbiang lana “Kiauclou tuang de” tubammeipu lev nchamc e.

²⁰Thing maek ge thei, mai amit re; lat row kasicmei maek ge thei, agay agimei nthaekc ge.

²¹Maithyn haenghmei rui maithyn ta tikagut thaulou kumc, thing rui mai tichuangclou kumc, agay agi tanhmei nunc rui lat lu tigeic e.

²²Nsuc nraucmei hei ndeih gay e; meic nazou kaduk key tangc e.

²³Kalungc khou sina mpaeng khou gayna sw bammei tei, bihlai khou daandi dui teymei kumh tuang de.

²⁴Gaylwn swpui mei tei thu kapaengc khou sachuyna, kalungc khou karaeng bam e.

²⁵Kalat tei gay hak tu kumcna chu nuh e; tiki kata lwm riu; kalam thu kalung tei kachy nganv karaengmei rui padik tangc bam tuang di the.

²⁶Kamei karaengmei tei nkamh bam sini, kataanv simei tei meic kathuicna how puni.

²⁷Meickai khang phah zawloumei nunc tei kaniw rana manc dat re; meickai khang ntauh kalatcloumei nunc khou tei, hei tei kahuy guang dat re.

²⁸Saraamhmei baley rui khuay maekmei ta ti-nkhuai e. Lungh nthan makmei latsav rui maanmei phungc guang e.