Read Rongmei Naga LATKWDYN 27 Bible Online

LATKWDYN 27 - Rongmei Naga bible

LATKWDYN 27

¹Nthuanh khang nang dudai sw riu; kalam thu kaganv rui tabui phungc guang puni cho nang thay mak ge.

²Meic baihmei rui nang ta thuanc kan diu; nang rana thuanh riu.

³Ntauh ni, syniang ni nrit re; tiki mpangmei rui tipat bammei lat lu hei nrit ranv e.

⁴Lunghpuamc pwkhou zauzian maek ge, khatni sw kasic karouclou nuh e; tiki mamavmei lev kida pwkhou, mi hei ramhkhat sini hamh e.

⁵Nkamhna nzianmei suangc, ndawna luhloumei rui gay e.

⁶Meic duang rui meic ta tikabiulou sini gay khang de; tiki zauczihmei rui kaput pw e thei ramhthay la tho.

⁷Nggu khou thu nkhuaihdui sini tu nii mak ge; tiki ndaapc khou thu nkhucmei sini ndeih de.

⁸Kakai khou rui ducna bampui mei tei, kabou khou rui ducna bammei nruayna kumc e.

⁹Karym namhgaymei thauc rui nang ta tineihlalou e; tiki katuakcmei rui lungh tiryanra e.

¹⁰Nang pam ta amuc riu; nang pu pammei guay ta ni amuc rio. Nang ryanramei khou keylou pwkhou nang chana na ta phu riu; ana khou bammei kainingmei rui duh thangc bammei chana suangc nkhavlou geic nuh e.

¹¹Anacle, ningtyng o; kum e thei ai neihla puni; kum e thei ata khanc bammei nunc khou tei ai latdaw khang nai puni.

¹²Kachwn sw thaymei nunc tei ryanramei guang nimei ta how thayna, mi khou tei rui ley duak puni; tiki kakhanh makmei nunc thu mi khou tei sowlouna ryanramei ariw puni.

¹³Zentelmei pow khang dinglou biuc rap mpangmeipu tei, katuang puat guay tei mi khang tei rui khaplou biuc rap be.

¹⁴Lauthwan thwanzingh thauna, kauc ranvna suaihiamloumei tei syang swna chaklou puni.

¹⁵Kara karing geihmei now hei nthaekc zat makna riu zingc bammei twn ting kumc e.

¹⁶Mi kumhmeipui ta khaamlou nimei hei mpwan ta khaam khang karamc bam kumh tuang e, thauh ta ruai thau lak kumh tuang e.

¹⁷Ntanh rui ntanh ta sw ntuk kumc, maansei rui maansei ta sw ntukmei tuang e.

¹⁸Tadut bang siamruai swpui mei tei, tadut thai laatow puni, khatni kakaipouc siamruai swpui mei ta tei champouhlou puni.

¹⁹Dui khou meic zaw how e, nang rana rui nanglung ta how e.

²⁰Taruaih rui padik zat makmei kumc, maansei mik ni pian zat mak ge.

²¹Mai rui daandi kachaekc ta nchanv e; maansei ta kata thuanhmei tei rui nchanv e.

²²Mpangmeipu ta paan sow kumc sowpuat paruatlou bam tisini, karampang tei kakhou rui tat pat ni tu hamh e.

²³Nang tuang lauziu nunc khatni nang tuang khouringc nunc ta kadanna sw o.

²⁴Kalam thu lanv hei kachac lakmei tuang hamh e. Guanghdic sini tingsaeng nai bam lak ge.

²⁵Ngeic thanh thau bam khou ga la tho, khatni chyngphay khou mphuaic tei ni tay la tho.

²⁶Nang tuang lauziu nunc hiw khou rui, nang tuang phey kasiamh nuh e, khatni nang tuang ziuc zuancna ramv puk liu nuh e.

²⁷Nang kai kaikhunc, nang bangcpui nunc nganvna ziuh noudui zangvna pumh gayna lungc nuh e.