Read Rongmei Naga LATKWDYN 28 Bible Online

LATKWDYN 28 - Rongmei Naga bible

LATKWDYN 28

¹Meicsimei nunc thu meic rui nthau mak sini pak ge; tiki nchumhmei nunc thu kamangliangpui kumc bauc e.

²Kandih akhat tei paapc taanc pwkhou, guangh kadyng ding ngam makna kalaic bam puni; tiki ntakmei khatni thei hu thaymei rui kaipouc swmei zaat tei tanc puni khatni tingsaeng puni.

³Lungcsimei nunc ta rairiu bammei, ngamv phunghmeipu tei nap-bi riu kasicmei ting lev nchamc e.

⁴Latdyn ta thouhsw makpui mei tei, meicsimei biak lianghmei e; tiki latdyn piumei nunc tei kaniw ta nuh mak ge.

⁵Meicgay makmei nunc rui nzihmei kiu tabui tei cho twmei thay mak ge; tiki RINGHPOUC ta kalummei nunc tei nzihmei ta thay chuyna thay e.

⁶Lungcgayna nchumh makmei chaeng tatmei suangc, lungcsina lungh nthanmei rui gay e.

⁷Latdyn piumei chabwan tei, ntakmei e. Gaeng makmei maansei ta pam swpui mei tei kapu zaw sw kasic bam tw e.

⁸Syanthuay laana meic nunc khou rui kadouchamei laa bammei nunc tuang lanv tei lungcsimei ta nzian thaymei nunc khang tat kan puni.

⁹Latdanv piu makmei nunc tuang ravsuai tei thu Ravguangc nkinglou khang sini karaeng e.

¹⁰Nchumhpui mei ta nkhuaimei chaeng khou zayloupui mei tei karana kaphac khou manc puni; khuay maekpui mei khang swan tiilou puni.

¹¹Lungcgaymei nunc rui kaniw ningtyng e twna kaganv thuic kakhanh e; tiki meic lungc thaymei lungcsimeipu tei rui kata how pary de.

¹²Meicgaymei nunc rui ngamv laa pwkhou, meic kathuicna neihla e; tiki meicgay makmei nunc rui dihsin pwkhou, meic nunc nkamh e.

¹³Kapaap nkamh bampui mei tei daic thau zat ni tu hamh e; tiki kapaap kalauh patna ganhpui mei tei Ravguangc zauzian laatow puni.

¹⁴RINGHPOUC ta pingna lungc bampui mei tei sangaymei e; tiki kalung tanhpui mei tei ryanramei khou keylou puni.

¹⁵Lungcsimei nunc tei meicsimei dihsinpouc hu khou swang dwang maek ge; kamei hei rah bammei kamangliangpui khatni kahukc bammei chagamh kumc meicpingmei tuang e.

¹⁶Si gay thay makmei guangc tei meic nunc ta rairiuna sin puni; tiki lungh nthan makmei ta karaengmei guangc tei ringc saengc puni.

¹⁷Meicdowpui mei tei karana katarou chau chadi bam tuang e. Kata khaamlou ti riu.

¹⁸Lungh nthanpui mei tei giuga makna lungc bam puni; tiki nkhuaimei chaeng tatpui mei tei thay mak liangna bow key puni.

¹⁹Lau alinghpui mei tei kabung khang sakbi sakba makna nai puni; nsa kaganv swmaan bammei nunc tei lungcsi bam puni.

²⁰Lungh nthanmei nunc tei suai- hiam geicna laatow puni; tiki lungcgay katumc khang sw e thei, nang ta dandi tii puni.

²¹Guhsw gahswmei hei nkhuai e; tiki maansei hei ntyan kiak akhat na khang rui sini nkhuaimei taanv taanc nuh e.

²²Tanthihmei nunc rui lanv ta lay zwanna lungc e; karuc khou lungcsimei keylou puni twmei kamei thaylou mak ge.

²³Nkhuaimei ta dinc ntwnlou tio; kum ti thei katangv thangc kamei mi ta tei mwang khou sathuanhmei ta suangc kahaw puni.

²⁴Kapui kapu khou rui houhmei tei nkhuai mak ge twna kakhanhpui mei tei kaihouhmei the.

²⁵Kakhang na ningpui mei rui lungh chamh makmei tipat re; tiki RINGHPOUC khou lwmloupui mei tei daic thau puni.

²⁶Karana kamei ningmei khou tatmei hei mpangmei tuang e; tiki ningting khou dincloumei thei layna lunghpui mei ta tei kanlou puni.

²⁷Lungcsimei khang tiipui mei tei maekna lungc lak ge. Lungcsimei nunc ta zauclou makpui mei ruc khou meic mpeyna syang keylou puni.

²⁸Meic gay makmei nunc rui ngamv phungc thau pwkhou, meic nunc mbeikai khou dup be; tiki kaniw ngamv khou rui taek key dat kan pw khou, ravchaptatmei nunc rui dihsin dat puni.