Read Rongmei Naga LATKWDYN 29 Bible Online

LATKWDYN 29 - Rongmei Naga bible

LATKWDYN 29

¹Azuh luh bam sini kanu tancna bampui mei tei, thay mak liangna gay dat ngam lakmei ramkabiu kabiu puni.

²Ravchaptatmei rui dihsin pwkhou meic nunc neihla e; tiki meicgay makmei rui dihsin pwkhou meic nunc puihuay e.

³Ningting kahawpui mei tei rui kapu ta tineihlalou e; tiki mangcsangmeiluc ta kaduang swpui mei rui kalanv nsa swmaan e.

⁴Guangh rui nchumhna tat pwkhou kaguangcdic sw ntip be; tiki lanvbiwmei kahawmei tei rui guanghdic swra e.

⁵Kapammei ta kamwang khou na sachuy bampui mei tei, karana kakhang phah zaw bam tw e.

⁶Meicsimei nunc tei kaniw rana kaniw paap phac khou manc e; tiki ravchaptatmei nunc thu neihlana lu suan bam e.

⁷Meicgaymei rui lungcsimei nunc tuang nchumhmei dam tei thay e; tiki meicsimei nunc thu mi kumhmei lam thay tangh mak ge.

⁸Meickai ta thouhsw makmei nunc tei rui kaidai kapwm ta tikatuakclou e. Ningtyngmei nunc rui ramh guay ti-nchulou e.

⁹Ntakmeipu rui mpangmeipu lev latzankai khou guang ding pwkhou, mpangmeipu rui kareic thauna sinnui e, chuzaenghmei maek ge.

¹⁰Zeimiw zeihaeng tikey niimei nunc tei lungh nthanmei nunc ta karaeng e, khatni nchumhmei nunc ta swluai khang phu e.

¹¹Mpangmei nunc rui kaniw lungpuam kapaengc khou lyan pat re; tiki ningtyngmei nunc rui khaengvna sinriap be.

¹²Saraamhmei lat tei guangh rui nking ti thei, katuang meicdaihmei guay tei saraamhpui mei rana puni.

¹³Lungcsimei khou ni, lungcsimei nunc ta sintu bammei nunc khou ni RINGHPOUC rui mik tiilou e.

¹⁴Lungcsimei nunc khang nchumhna latzan swloumei guangc panty lungsing puni.

¹⁵Riaploumei rui alauc nunc ta ti ningtynglou e; tiki kanyng swna mpatloumei nac rui kapui zaw sw kasic e.

¹⁶Meicgay makmei nunc rui ngamv sin e thei twan lyammei taanv geic e; tiki ravchaptatmei tei thu mi kumhmei nunc bow keymei ta how puni.

¹⁷Nang nac ta riap bo, kum e thei kamei rui nang lung tiryanra lak ge; kamei rui nang ta tineihlalou puni.

¹⁸Ravguangc rui ndauhloumei maekmei kandic tei zin zin za zana lungc puni. Ravguangc latdanv piupui mei tei sangaymei e.

¹⁹Lat na rui bangh ta ncham ntwn ngam mak ge. Sa bammei tei kamei kabah thay sini laalou ni tu hamh e.

²⁰Thowkumhmei kakhanh makna sameipu khang suangc, mpang nlomeipu khang theidwan gay mbu e.

²¹Nang rui nang bangc khang kamei kahawmei guay alauc khou rui tii thau ti thei, neih khat thu kamei rui nang tuang naimei guay laa kan puni.

²²Kareic duimei nunc tei rui agay agimei khatni katuakc katitmei tipat re.

²³Liantimei rui nang ta swbow e; tiki niamhpui mei ta chakhwang swlou e.

²⁴Kaihouhmei pam swmeipu tei karana kata zauczihmei e. Kamei latzankai khou nchumhmei sa tithei, kata dandi tii puni, saraamc ti thei ni Ravguangc syang keylou puni.

²⁵Maansei ta pingmei hei kabiu nuhmei tuang de; tiki RINGHPOUC khou lwmloumei hei thu giuga khang maek khe.

²⁶Meic kathuicna guangh tuang zauzian ta kahaw e; tiki RINGHPOUC khou na rui nzihmei laatow puni.

²⁷Ravchaptatmei nunc rui meicsimei nunc ta karaeng e, khatni meicsimei nunc rui ravchaptatmei nunc ta karaeng e.