Read Rongmei Naga LATKWDYN 3 Bible Online

LATKWDYN 3 - Rongmei Naga bible

LATKWDYN 3

¹Anacle, ai rui nang khang nchamloumei hei amuc riu. Ai rui nang ta mi hei taanc nina e twna saloumei guay tei ningtow tanh tan o.

²Ai rui dincloumei hei rui nang khang panty lungsingmei khatni lungcsaengc lungcdaihmei tiilou puni.

³Nzianmei khatni lwmnuhmei ta tabui nungc na sini mpat riu. Mi hei nang guang khou nleilou o; mi hei nang lung khou hylou o.

⁴Nang mi hei sw e thei, Ravguangc rui ni maansei rui ni nang ta pianlou puni.

⁵RINGHPOUC khou nanglung kapwm rui lwmlou o. Nang ramthai khou tei ngangvlou riu.

⁶Nang taanc nimei kathuicna tei RINGHPOUC khou poulou o, kum e thei nang tat nimei chaeng kamei rui dinclou puni.

⁷Nang rana nang ta ningtyngmei e twna ning riu; RINGHPOUC lat piu o khatni nkhuaimei taanv taanh riu.

⁸Nang mi kumna lungc e thei, mi hei rui puc gaymei rui nang zam nang zei tigaylouna kaphut kachiatcmei ti-nchu rih riloumei kumc puni.

⁹Nang laupuk khou nthai rey liangmei gay liangmei tei RINGHPOUC khang katna kata chakhwang champouh o.

¹⁰Nang mi kumcna taanc e thei, nang saamc nap-bi padik puni, khatni nang tuang drakhadui lai chungc lyam bam puni.

¹¹Anacle, RINGHPOUC rui nang ta riap ntwn khang swmei ta thouhsw mak tuang sw la riu, khatni kamei rui luhmei ta tei lunghpuamh rio.

¹²Kapu rui ningkunghmei nac mpouh ta riap ntwnloumei kumcna RINGHPOUC rui kamei nzianmei nunc ta riap ntwnlou e.

¹³Ningting laatow kanpui mei, sigay thaymei laatow kanpui mei tei sangaymei e.

¹⁴Mi hei daandi suangc kungc e; mi hei kachaekc suangc ni kungc e.

¹⁵Ningting hei kaphut suangc ni kungc e; nang kahawmei puat ramhkhat na lev sini mi hei kida khang maek ge.

¹⁶Ningting rui nang ta tipanty lungsinglou e, mi na hamhna lanv khatni champouhmei ni tiilou e.

¹⁷Ningting rui nang panty ti-amanvlou ngam e khatni nang panty chaenglwan khou giuga makna zaylou ngam e.

¹⁸Ningting laatow kanmei nunc tei sangaymei e; ningting rui kaniw khang ringhmei tiilou puni.

¹⁹RINGHPOUC kaningting rui mbaanv damclou e; katakh rui tingpuk ta kabamv khou duanclou e.

²⁰Kaningting rui duithuak tiluangclou e khatni muangh tithaulouna kandih khou ting tiriu keylou e.

²¹Anacle, nang tuang ningting khatni takh tei sin ntip bam o; hei tei tabui nungc na sini mpat dat la ri tho.

²²Hei tei rui nang ringcpaan khou neihla amanvna tilungclou puni.

²³Mi paan tei rui nang panty chaenglwan khou, suai ngaammei maekna khatni phaysuy baanhsuanghmei maekna tat ngam puni.

²⁴Nang nang zy khou zipkey pwkhou ping rouh tuang nai lak ge, kumna nang zingbangc saanvsaengh zipsuy zipmangna zip puni.

²⁵Thay mak daek khou sw kasic karoucmei, pwanzingh kumcna meicsimei nunc ruc khou guanglou kanmei kumcna guanglou pw khang lungh ryanra lak ge.

²⁶RINGHPOUC rui nang ta gaeklou puni. Kamei rui nang ta phah raengh khou tikeylou lak ge.

²⁷Nang rui ngammei lungc khou e thei, kage naimei nunc khang nkhavlou o.

²⁸Ntaw nang rui nkhavlou diwmei tei nthuanh rui twna kaining kaigeimei khou sa riu.

²⁹Nang kainingmei ta tikabiu nimei tuang ramhkhat na sini taanh riu; kamei nang ta lwmna nang daeng khou lungc bam tuang e.

³⁰Nang khou simei khat na sini taanclou makmeipu ta tei kalam maekna agay riu.

³¹Meicngam meicliammei taanv taanhmei nunc ta mamav riu, hamh e thei kaniw rui taanhmei tei lay taanh khang ning rio.

³²Kalam thu simei taanhmei nunc ta RINGHPOUC karaeng e; tiki ravchaptatmei nunc ta kadaeng khou tibamlou e.

³³Meicsimei nunc kaikhunc guay khou tei RINGHPOUC syang keylou e, tiki ravchaptatmei nunc kaikhunc guay ta suaihiamlou e.

³⁴Kalung mphuammei nunc ta kamei karaeng e, tiki niamhmei nunc ta zauc nzianlou e.

³⁵Ningtyngmei nunc tei champouhlou nuhmei zanh gaymei laatow puni, tiki mpangmei nunc tei zak hay hayna lungc puni.