Read Rongmei Naga LATKWDYN 30 Bible Online

LATKWDYN 30 - Rongmei Naga bible

LATKWDYN 30

¹Mi guay hei Jake nac mpouh Agur tuang latkw guay e: “Ravguangc ata nduanghlou mak ge, Ravguangc ata nduanghlou mak ge, ai ngangvbamv maek khe.

²Ai hei maansei hamh the, khouringh di the; maansei ningting akhou maek khe.

³Ai ningting khat sini nchumhna thaylou mak khe, khatni ai Ravguangc lam khou ramhkhat sini thay mak khe.

⁴Tingkauh ku tangcna key datmei thow nai cho? Mpwan ta kabaanc khou kazum ngammei thow nai cho? Dui ta phey khou kachuang ngammei thow nai cho? Kandih tin tou ramvrei baengclou ngammei thow nai cho? Mi kumhpui mei ta nang thay e thei kazanc akumh cho? Kanac zanc akumh cho?

⁵“Ravguangc thu kalatdyng suai mak ge. Kakhou duploumei guay khang kamei thu nggih kumh tuang e.

⁶Ravguangc lat khou tei sahaaplou riu, haaplou ti thei kamei rui nang ta mphut puni khatni nang hei saraamhmei e twmei kamei rui lyanlou puni.”

⁷He Ravguangc, nang khou ai ramh kanei na ney nii e; ai ringc bammei dak khou na tiilou o. Mi kiu thu:

⁸Saraamhmei twmei hei akhou rui ducna laa ganclou o, khatni ata tilungcgay ni lungcgaylou riu, tilungcsi ni lungcsilou riu. Kumna ai tu biuc zangv biuc khang na tiilou o.

⁹Ai lungcgay e thei nang ta amuc nuh e, lungcsi e thei ni houc tu houc zangvna Ravguangc zaw sw kasic nuh e.

¹⁰Bangh ta kakaipouc hu khou sa kasic la riu, nang ta sianglou tina syang phungc bam lam e.

¹¹Meic gaanvsaekc kaniw pu ta siang bammei nai e, khatni kapui ta thuancku makmei nai e.

¹²Meic gaanvsaekc thu kaniw kanganv tangcna tanac lana, kaniw nthan de twna ning bammei nai e.

¹³Meic gaanvsaekc rui kaniw heidikamv gay e twna ning e; kaniw adihkamv gay cho twna kaniw kakhanh e.

¹⁴Meic gaanvsaekc rui lungcsimei nunc ruc khou zauzian maekna kadow chamei laa e; hei tei kumcna kaniw bung khang ntaanv e.

¹⁵Mbat kui kanac aluh gaanv nei nai e, “Tii o, Tii o,” twna kaney rui kauc e. Pian zat makmei ramh padeih nai e:

¹⁶Taruaih, nakamcpeic, sypungramv rui ting ta kahawmei, khatni khaam ngam makmei chuangc bammei mai hei e.

¹⁷Thow pw ni kapu ta sinnuipui mei, hamh e thei kapui karacpeic key pwkhou karaengpui mei ta tei laengdia rui tu puni; hamh e thei agaekc rui kamik thuaic tu puni.

¹⁸Kabah thay tangc ngam thuy lakmei ramh padeih nai e:

¹⁹tingpuk kauh khou mouckauh rui samc bammei, nrui rui tautuangc khou tuic bammei, rungh rui duipui khou tat bammei khatni ntumei lev nggaanvmei nzianmei.

²⁰Meicbaihmei ta kachuc lana, “Ai ramh sw mak ge,” twna samei hei lwm nuh makmei now thiak ge.

²¹Kandih rui khaengv bam ngam makmei ramh padeih nai e:

²²bangh khat rui guangh swmei; mpangmei rui nap-bi geihmei;

²³meicsimeipui rui mihmei; banghpui rui kakaipeic phaan lynmei.

²⁴Nthyam sini ningtyng sihmei ramh kui padeih kandih nam ruc khou nai e:

²⁵ntiang: kaniw hei suan de, tiki tinglwm khou kaniw taek khuam kaduailou e;

²⁶mbepui: kaniw hei tanh mak ge, tiki khow khou kaniw kai swlou e;

²⁷alunkav: kaniw guangh maek ge, tiki kaniw kapang swna tat re;

²⁸duanghkhwanpui: mi ti hei meic baanc rui nym nuh de, tiki mi hei guanghkai khou ni bam e.

²⁹Karamtat howgaymei ramh padeih nai e:

³⁰Khouringh pang khou tanc liangmei, ramhkhat na ta sini rouh makmei kamangliangpui chaengtat;

³¹ziuchic nunc chaengtat; liam siamh siamna tatmei nruay duic chaengtat; khatni guangh rui meic nunc hu khou tat patmei chaengtat.

³²Nang lyanti khang khatni simei taanh khang sw biuc rap mpang e thei, nthaekcna kakhanh o!

³³Guaihnoudui tei kapinh ti thei kabangv pat re; meickai nukwang kazwm ti thei zei pat re; meickai lungpuam tithau tithei ryanramei ariw puni.