Read Rongmei Naga LATKWDYN 31 Bible Online

LATKWDYN 31 - Rongmei Naga bible

LATKWDYN 31

¹Mi hei Guangh Lemuel khou kapui rui nchamloumei lat re:

²“Nang hei ai rui nzianmei nac mpouh kahak ge; ai huayneymei dawloumei nac mpouh e. Ai nang khou tabui nchamlou nina cho?

³Nang pumtan guay tei ntumei khang sinsw riu, khatni nang tuang syan lanv guay tei ntumei khou piulou riu. Mi guay hei rui guangh nac nunc ta swmaanpui tuang e.

⁴Nking o, Lemuel, Guangh thu zouh zangv lak nina e; zouziu kahaw lak nina e.

⁵Guangh rui zouh zangv e thei, latdanv guay tei amuc puni, khatni lungcsimei ta zauclou thay mak puni.

⁶Zouziu hei theic kan nina bammei nunc khang e; ramh sw la khang thay makmei ramrianra ryanra bammei nunc khang e.

⁷Kaniw zangv kan diu, kumna kaniw ramlungsi khatni kaniw ryanra amuc kan diu.

⁸“Kaniw rana khang sini sa thay makmei nunc khang tei sa nkhavlou o. Ngangv bamv maekmei nunc khang nkhavlou tio.

⁹Kaniw khang salou tio, kumna nchumhmei latzan swlou tio. Lungcsimei nunc khang swlou nimei thouc tei swlou tio.”

¹⁰Now gaymei phutow khang adih kungc kan tu cho! Now gaymei hei kachaekc kaphut suangc kungc e.

¹¹Kagaanv rui kata lwm e, khatni kamei lwmsi zat mak ge.

¹²Kamei ringc bam saanv, kagaanv khang gay khang na swlou e; si khang swlou zat mak ge.

¹³Kamei ramhhiw phey khatni linen phey kasiamh khang tynna bam e.

¹⁴Lanvguanhmei rungc kumc kamei rui duh duhmei bamv thangc rui kakai khou taektw phungc guang e.

¹⁵Tinggaanh mak khou rui zipthau zaicna, kaikhunh khang taektw chamdaanvna banghpui nunc khang taanv nzanh e.

¹⁶Kamei rui ramv dui nganvna zaucna liu e; kamei rui ntaanv guangmei syan rui drakhalau kasiamh e.

¹⁷Kamei alinghna khatni ranvna taanc e.

¹⁸Kamei rui ramh guay gaeng nimei, gaeng lak nimei kakhanhna taanc e; zip khang thay makna taanc e.

¹⁹Kaphey kabaan khang kabaanc rui ruaicna dak ge.

²⁰Kamei lungcsimei khang tii khang kabaanc daic e.

²¹Gunh keymei ta kamei ping mak ge; tingsei phey kakai khang gaat mak ge.

²²Kamei zybam phey kasiamh e khatni kunghmei pheybaan baanv e.

²³Kagaanv tei sanghbamv khou gaanvthaih pang khou dungc bam khou nganv, meic nunc rui ning karuh e.

²⁴Kamei rui phey khatni bungkam dak lana lanvguanhmei nunc khou zuanc e.

²⁵Kamei hei tanc e, kumna kata champouh e khatni theic thangc khang lungh geih mak ge.

²⁶Niamhna ningting kazauhna kamei lat sa e.

²⁷Kamei kaganv thuic tyn bam e khatni kakai kaikhunc khang kage naimei guay zauclou bam e.

²⁸Kanac nunc rui kata thuanc bam e; kagaanv rui ni thuanc bam e.

²⁹Kagaanv rui sa e, “Now gaymei mpeyna nai e; tiki nang rui gay karuhsyng e.”

³⁰Mangui zaw hei meicguatmei de; lwnchav gaymei ni maan kan ni de; tiki RINGHPOUC ta champouhmeipui ta thuanc bam puni.

³¹Kamei rui taancloumei guay tei chaklou tio. Meic kathuic rui kata champouhlou biuc rap be.