Read Rongmei Naga LATKWDYN 4 Bible Online

LATKWDYN 4 - Rongmei Naga bible

LATKWDYN 4

¹Anacle, nang pu rui nang ta ncham bammei hei nking o; lungh gutna nking o; kum e thei nang khang sigay thaymei laatow puni.

²Ai rui nang khou gaymei riak nchamlou bammei tuang e, kumna mi hei amuc riu.

³Ai hei apui apu rui puanhmei akhat na mei swna alaucna swna bammei douc,

⁴apu rui ata ncham bam khwan e. Kamei rui mi kumcna sa bam khwan e: “Ai rui samei hei ningtow o khatni mi hei khat sini amuc riu. Ai rui nang khou samei kumcna taanc o, kum e thei nang ringc puni.

⁵Ningtyng khang howduhmei laa o! Ai rui samei hei amuc riu; thouhsw mak tuang sw rio.

⁶Ningting ta mpat riu, kum e thei mi hei rui nang ta gaeklou puni; ningting ta nzian o, kum e thei mi hei rui nang ta gulou puni.

⁷Ningting phumei twmei hei nang khang nthuk liangmei taanv e; mi tangv howduhmei twmei hei e.

⁸Ningting ta nzian o, kum e thei mi hei rui nang ta tisaengc tidaiclou puni. Kata pamc ntip bo, kum e thei mi hei rui nang ta chakhwang champouhlou puni.

⁹Mi hei nang khang hymdaihmei guanghpyrun sw puni.”

¹⁰Anacle, ai sa bammei hei nking o. Ai rui nang khou dinc bammei hei laalou o. Kum e thei nang panty lungsingna lungc puni.

¹¹Ai rui nang khou ningting dinclou kan the; nchumhmei chaeng khou zaylou kan the.

¹²Nang ningtyngna tat re thei, nang chaeng khou khamv namvmei nai lak ge, khatni nang pak pwkhou nang phay kalanv lak ge.

¹³Nang thay kanmei tei sin tanh tan o, mpat dat ri tho; nang rui thaylou kanmei tei nang ta tiringc nimei tuang the; hei tei swmaan dat la ri tho.

¹⁴Meicgay makmei nunc rui tatmei chaeng khou tei tat rio; meicsimei nunc thak layluaih riu.

¹⁵Simei taanv taanh riu! Mi khou tei rui ducna bam o! Khanv pwsini nuhlou la riu, hei tei ganclouna tat ro.

¹⁶Meicsimei nunc tei simei taanv taanclou lam mak ge thei zipkey thuy mak ge; meic gaanv khat na ta sini tikabiulou lam mak saanv mik ngganvna rak bam e.

¹⁷Meicsimei taanv khatni meicngam meicliammei taanv hei kaniw khang tu zangv tuang kumh tuang di the.

¹⁸Ravchaptatmei nunc rui tatmei chaeng hei neih patmei kumh tuang e; tinggaanc neihsouh kumh tuang e.

¹⁹Tiki meicsimei nunc chaeng thu zingbangc kumc zingc e. Kaniw phay kalanvna bow la sini tabui rui tibow tu cho twmei how mak ge.

²⁰Anacle, ai rui samei lat khou hei lungh gutlou o, ai rui sa bammei hei nking o.

²¹Tabui nungc na sini mi guay tei nang khou rui titat pat dat la ri tho. Mi guay tei ningtow o khatni nang lung khou rylou o.

²²Mi guay tei kabah thaymei nunc khou tei mi guay tei rui ringhmei khatni pumhgaymei tiilou puni.

²³Nang lung khou kakhanh bammei tei simei ny, gaymei ny kakhanh chuy o; hei tei rui nang panty kasiamhmei tuang e.

²⁴Nchumh maekmei lat tabui nungc na sini sa riu. Saraamhmei lat khatni zay mbianghmei lat khat na sini sa rio.

²⁵Lungh nthanna lwmgaymei kazauhna hu thangc zauc ntyng ding pat ro; zakna nang py nkhum bam riu.

²⁶Nang taanc nimei tei raengc chuyna taanc o, kum e thei nang taanc suai lak ge.

²⁷Simei khou rui duc tat ro khatni hu thangc tat ntyng ding gut ro. Nchumhmei chaeng khou rui kaamv khat na sini kaamc mbiangh pat riu.