Read Rongmei Naga LATKWDYN 5 Bible Online

LATKWDYN 5 - Rongmei Naga bible

LATKWDYN 5

¹Anacle, ai rui nang khou ningting khatni sigay nchamloumei hei lungh gutna nking o.

²Kum e thei nang chakhiw chakhei thayna lungc puni, khatni nang latsav rui nang khou ningtyng nai e twmei lyan puni.

³Kachwn ruangmeipui tuang chy tei nkhuaihdui kumc ndeih bam nuh e, khatni kamwang tei laengkic thauc kumc ani bam nuh e.

⁴Tiki nkhamh khou nkhuc ngganh kumc nkhuc puni; kamun kaneimei baengsaeng kumc puni.

⁵Kamei rui nang ta taruaih thangc zay keylou puni, kamei tatmei chaeng hei theihmei chaeng e.

⁶Kamei ringhmei chaeng khou tat mak ge; mi khou tei rui ducna tat re; tiki kamei mi hei thay mak ge.

⁷Anacle, alat hei nking o, kumna mi hei tabui nungc na sini amuc riu.

⁸Mi kumhmei ntumei khou rui ducna bam o! Kakai kaimun daeng khou na sini tat guang tuanc la riu.

⁹Nang mi khou tei tatlou e thei, nang khou nai bammei champouhmei tei maan puni, kumna zauzian maekmei nunc baanc khou nang chabwan swna theiclou puni.

¹⁰Ngguay, meic baihmei rui nang tuang lanv guayna laa puni, khatni nang rui taancloumei nang tuang tei meic baihmei tuang sw puni.

¹¹Nang tei, nang thuat guay kangc ngamna, nang tuang theih laeng khou kahui kasing bam puni.

¹²Khoutei nang rui mi kumna sa puni: “Tabui swna ai ata nchamc bammei douc tei laalou mak kan tu cho? Ata sw ntwn khang sw bammei tei tabui swna ai piulou mak kan tu cho?

¹³Ata nchamloumei nunc lat chulou mak khwan the. Kaniw lat tei ai lungh gutlou mak khwan the.

¹⁴Mi zaeng rui thay mak liangna kandihmei hu khou zak kasicmei ariw the.”

¹⁵Nang now khou lwmnuhmei sw o, kumna kata nzianna lungc o.

¹⁶Ntumei baihmei khou rui puanhmei nang nac nunc tei rui nang khang gaymei phungc guang ni tu hamh e.

¹⁷Nang nac nunc tei daic thauna nang ta nkhav puni; meic baihmei rui hamh e.

¹⁸Kumna nang rui nggaanv douc kawloumei now lev neihlana lungc bam o.

¹⁹Asanhnay kumc kalwn kachav gaymeipui e. Karamgai ta tei nang kahawna neihla bam o. Karamzian rui nang ta kasiatc bin bam kan diu.

²⁰Anacle, tabui swna nang ntumei baihmei ta nzian dat bam nina cho? Tabui swna meic baihmei ta how kahaw bam nina cho?

²¹Nang rui taanhmei kathuic tei RINGHPOUC how e. Nang tatpui bamv kathuic khou kamei nang ta zauc bam e.

²²Meicsimei nunc tuang simei taanv guay tei phah de. Kamei karana kapaap phac khou manc e.

²³Karana kata sinriap ngam makpui zaeng rui kamei theic e; kapang simei zaeng rui kamei tarou khou key e.