Read Rongmei Naga LATKWDYN 6 Bible Online

LATKWDYN 6 - Rongmei Naga bible

LATKWDYN 6

¹Anacle, nang meicramcmei pow khang dinglou bam tu cho?

²Nang lat khou nang manc bam tu cho? Nang latdyng khou manc bam tu cho?

³Kum e thei gay the, anacle, nang mipu tuang baanc bangc khou gutlou bam the. Mi khou tei rui duak dat nimei chaeng thu mi hei e: kadaeng thangc katumcna tatna mpatlou dat khang ney o.

⁴Nang mik hiw biwkariu dat ri tho, nthaekc ni nthaekc bam ri tho.

⁵Nruayna phah kih khou rui pak duak kumc, asanh phah manc duak kumc pak duak khang sw la tho.

⁶Aliauhmei nunc tei ntiang khou rui ncham o.

⁷Kaniw khou kapy swmei ni, dihsinpouc ni maek ge;

⁸tiki kaniw lailwm khou kataek khuam kaduailou e, tingsei khang chamdaanvlou e.

⁹Aliauhmei tei asaanh kalaeng khou zip bam nina cho?

¹⁰“Ai nthaekc ni he, abaanc pamcna nthaekc kanak ni he,” twna kamei sa e.

¹¹Tiki kamei zip bam khou buy-baeng sinmei kwamtumei nunc kumc, kata lungcsimei rui kwam guang puni.

¹²Gaeng makmei, meicsimei nunc ruanna saraamc tat bam e.

¹³Kaniw mik kakhipna nang ta guat khang sw bam e.

¹⁴Kaniw tuang si kanmei lung khou simei rana raengc bam e, kabamv kathuic khou kaguatc tangnouh tat bam e.

¹⁵Mi zaeng rui, thay mak liang khou sw kasic karoucmei kaniw ruc khou guang puni, kumna kaniw kabiu kasic karoucna kabiu puni.

¹⁶RINGHPOUC rui karaengmei zauc bam thuy lakmei chanei nai e:

¹⁷mi kiu thu daihriw swna meic gaanv khat ta loukeymei mikzaw, saraamcna samei khatni khuay maekmei ta swluaimei,

¹⁸kheih simei raeng kakhanh bammei, simei taanh khang mazatmei,

¹⁹saraamhmei sakhi tiimei khat lev khat kak khou agay khang thoucloumei mi guay hei e.

²⁰Anacle, nang pu rui samei tei piu o, khatni nang pui rui nchamloumei tei tabui nungc na sini amuc riu.

²¹Kaney lat guay tei nang khou lou tanh tan o, nang lung khou rylou o.

²²Kaney rui nchamloumei tei rui nang tat pwkhou chaengzaylou puni, zip bam khou nang ta gaeklou puni, khatni kalaanv nang khou nchamlou puni.

²³Kaney rui dinc diangcloumei tei gaanc bammei mai riw e; kaney tuang ncham ntwnloumei tei ringhmei chaeng e.

²⁴Mi guay rui nang ta simei ntumei khou rui gaeklou puni, meickai now nunc tuang animei nthiammei mwang khou rui kanlou puni.

²⁵Kaniw lwnchav gaymei tei nang kahaw riu; kaniw mik khwan khou tei nang manh riu.

²⁶Ntyan dwm akhat manv rui mangcsangmei luc akhat laa nuh e, tiki meickai now sowmei rui katuang naimei guay maan puni.

²⁷Nang phey raw makna nang ngaengv khou mai pamc tat bam nuh dina cho?

²⁸Nang phaypav chuap makna nang maithyn haenghmei ruc khou tat bam nuh dina cho?

²⁹Meickai now lev zipmei ni hei tei kumh tuang e, kamei dandi mphang makna taan lak ge.

³⁰Ndaapcna nap houc tumeipu ta tei meic nunc lunghpuamc rap mak ge;

³¹kum sini kata nym e thei, kamei kadam chanei mbuna khangc dat nina e— katuang naimei kaguayna kamei tiipat nina e.

³²Tiki meickai now ta lungcmaanvmeipu tei how duc lam makna e. Kamei karana kata sw kasic bam tu e.

³³Kata tizaklou puni khatni bai puni; kamei tingsaeng zak bam puni.

³⁴Gaanv tei kanow ta swkasiclou pwkhou lungpuamc suang puamhmei lungpuam maek khe; kamei rui khwm khangc niimei tei kanganv maek ge.

³⁵Tabui bui khapmei ta ni kamei laa nii tuang hamh e; kaipat azuh rui ni kalungpuam kakim ngam mak ge.