Read Rongmei Naga LATKWDYN 7 Bible Online

LATKWDYN 7 - Rongmei Naga bible

LATKWDYN 7

¹Anacle, ai rui samei hei ningtow o, khatni ai rui nang ta kum o twna saloumei tei amuc riu.

²Ai rui samei hei taanc o, kum e thei nang ringc saengc puni. Nang mikna ta ngaekmei kumcna, ai rui nchamloumei hei piu khang kadanna lungc o.

³Ai rui nchamloumei hei mpat zat la rio; mi hei nang lung khou hylou o.

⁴Ningting ta nang tanpui ta kumc, khatni howduhmei ta nduangh dianghmei pam ta kumc ning o.

⁵Mi hei rui nang ta meickai now tuang kamwang animei, nthiammei khou rui ti-mpaan patlou puni.

⁶Zaeng neih khat ai akai kailat khou rui zauc pat pwki,

⁷ramh thay makmei chabwan pang khou mpangmei gaanv khat ta how pat khwan e.

⁸Chaeng kwn akhat khou lungc bammei gaanv khat pui kai biak thangc kamei tat guangna,

⁹Tingzin zingc key pwkhou, mipui kai daeng khou tei guang khwan e.

¹⁰Khoutei mipui tei mangcsangmeiluc pwan piuna, chamdaanvna kata patna ariw khwan e.

¹¹Kamei tei zak thay makmei, kaganv thuic chaengdai khou tat bammei, ramh ping thay makmeipui khwan e.

¹²Chaengluang chaengluang khou, kaithyan bamv bamv khou rikna ding tat bammeipui khwan e.

¹³Kamei rui mi chabwan ta tei pamcna kaputna, kazaw zauc adyangna sa khwan e,

¹⁴“Aseic hei akai thouh swna tu ngam zangv ngam lakna nai e.

¹⁵Ai nang ta phu pat tuang e. Ai nang ta ariw niina bam khou nang ta mi khou hei ariw tuang the.

¹⁶Ai rui laeng ni Izip tuang karangmei linen phey rui bamclou kan the.

¹⁷Mi khou tei namh gaymei thauc zaat guay ni zinlou kan the.

¹⁸Guang o. Aseic zingbangc nzian thangc bam kho. Nzianna nungngaina bam kho.

¹⁹Agaanv kai khou bam mak ge. Kamei duh thangc nggin tat kan de.

²⁰Kamei syan mpeyna phungcna tat kan de; bwlanv thangc rui guang dat khang de.”

²¹Mi kumna kamei rui nthiam the, khatni mipui tuang animei latsav khou tei kamei bowlou kan the.

²²Mipu tei guaichic kata dowluai nimei bamv nzwan kumc, asanh kalungthw pailu rui hui nipui phac khou kachuamh gut kumc, mi pui thei tei lay tat kan the.

²³Kamei tei phah khou kachakloumei nruayna kumc, mi khou tei kamei theiclou puni twmei thay mak khwan e.

²⁴Mi zaeng rui, anacle, ai samei hei nking o. Ai samei khou hei lungh gutna laalou o.

²⁵Mi kumhmeipui hei rui nang lung ta tingamlou riu, kata phuna ruan tat bam riu.

²⁶Kamei rui nggaanvmei mpeyna ta swkasiclou the, khatni kamei rui swluai kanmei sing meic chak dat thay mak khe.

²⁷Nang ni mi kumhmeipui kai thangc tei tat re thei, nang hei taruaih chaengdai khou tat bam e twmei thay o. Mi hei theih chaeng chaengsam e.