Read Rongmei Naga LATKWDYN 8 Bible Online

LATKWDYN 8 - Rongmei Naga bible

LATKWDYN 8

¹Nking o! Ningting rui kauc bam e. Si gay thaymei rui khwan ranvna kauc bam e.

²Chaeng daeng chyng twan chyng twan khou, khatni chaengkhaak chaengkhaak khou dingna kauc bam e.

³Kaidai raengcmun daeng khou, raenghkat daeng daeng khou kamei kauc bam e:

⁴“Meicsimei nunc, ai rui nangniw khou sa bam e; kandih khou lungc bammei meic katana ta ai rui kaw e.

⁵Nang angana sw bam tu cho? Gaanvthaih sw khang ncham o. Nang mpang bam tu cho? Ramhsi ramhgay thay khang ncham o.

⁶Atuang gay karucsyngmei lat guay hei nking o; ai rui nang khou sa bammei lat guay hei nchumhmei lat re.

⁷Ai rui sa bammei hei nchumhmei lat re; saraamhmei ta ai karaeng e.

⁸Ai rui samei guay hei nchumhmei lat re; nkhuaimei khat sini maek ge, zay mbianghlou nimei tuang maek ge.

⁹Ningtyngmeipu khang thu mi hei nthan thiakh thiakmei lat re; thaymeipu khang mi hei nchumh rapmei lat re.

¹⁰Ai rui nchamloumei hei daandi phaan laalou o; gay liangmei kachaekc ta suangc alat guay hei laalou o.

¹¹“Ai hei ningting kiu the, ai hei kaphut suangc kunghmei e; nang rui kahawmei puat ramhkhat na lev sini ata kida khang maek ge.

¹²Ai hei ningting kiu the, khatni akhou si gay thaymei ningting nai e; akhou thaymei khatni nchumhna latzan sw ngammei nai e.

¹³RINGHPOUC ta pingmei twmei hei simei ta karaengmei tei e. Daihriw swmei khatni gaengh swmei, simei taanv khatni saraamhmei lat, mi guay ti hei ai karaeng e.

¹⁴Ai hei taanc nimei guay raengclou lana taanc pat re. Ai thei hu thay e khatni apumtan nai e.

¹⁵Dihsin khang guangh nunc ta khatni latdanv gaymei kasiamh khang dihsinpouc nunc ta ai rui nkhavlou e.

¹⁶Kandih nam ruc khou naimei dihsinpouc kathuicna, ai rui nkhavloumei paan rui dihsin bam tuang e; kandih kaipouc nunc ni apaan rui kandih sin bam tuang e.

¹⁷Ata nzianmei nunc ta ai nzian e, ata phumei kathuic phutow puni.

¹⁸Lungcgay chingkhiuhmei akhou nai e, lungcsaengc lungcdaih khang khatni zaw kauh khang akhou nai e.

¹⁹akhou rui laatowmei thai hei gay liangmei kachaekc suangc gay e, nthan liangmei daandi suangc ni gay e.

²⁰Ai hei ravchaptatmei chaeng khou tat re; nchumhmei chaeng ai suic e.

²¹Ata nzianmei nunc khang lanv tii e, kaniw kai khiuh khingh tipadiklou e.

²²“Ravguangc rui ata rey liangna damclou the, kataanv pang khou rey liangmei swna reydouc rui damclou the.

²³Kahouh rey liang rap khou ata damclou the, mbaanv kandic nai mak khou rui damclou the.

²⁴Duipui guay nai mak khou rui, duipuakckai guay nai mak khou rui ata puanclou bam khwan the.

²⁵Chyngbut guay nai mak khou rui, luanghbut guay damclou mak khou rui, ata puanclou bam khwan the.

²⁶Ravguangc rui mbaanv khatni ramvpuk guay damclou makmei hu thangc rui, syniang baanzwm khat na sini nai mak khou rui ata puanclou khwan the.

²⁷Tingpuk damh khou tei ai nai bam khwan the, kamei rui duipui ruc khou tingpuk damc ngguiclou khou tei ai nai bam khwan the.

²⁸Kamei rui tingpuk khou muangh tipatlou khou tei ai nai bam khwan the; kamei rui duipui duipuakckai guay laanclou khou tei ai nai bam khwan the.

²⁹Kamei rui luangc lyam pat mak khang duipui ta latdanv pat khou; kamei rui kandih bamv guay kasiamhlou khou tei ai nai bam khwan the.

³⁰Khoutei ai kaiswmeipu kumcna kadaeng khou bam khwan e; ai rui kata tingmik kathuic tineihlalou bam khwan e, kahu khou kaganv thuic ai neihlana bam khwan e.

³¹Katuang mbaanv ta ai neihla bam khwan e, khatni maansei nac nunc ta neihla bam khwan e.

³²“Mi zaeng rui, chabwan nunc, ai samei hei nking o. Ai rui samei kumcna taanc e thei nang neihlana lungc puni.

³³Nang ta ncham bammei hei nking o. Ningtyng thay o, kumna mi guay ti hei ntaamv riu.

³⁴Ai rui sa bammei hei nkingpui mei, tingmik kathuic akai chaengmun khou nkhwanna bampui mei tei, neihlamei laatow puni.

³⁵Ata laatowpui mei tei ringhmei laatow the, kumna RINGHPOUC rui kata pianlou puni.

³⁶Ata laatow makpui mei tei karana kata sw kasic e; ata kahaw makpui mei tei theihmei ta kahaw lana e.”