Read Rongmei Naga LATKWDYN 9 Bible Online

LATKWDYN 9 - Rongmei Naga bible

LATKWDYN 9

¹Ningting rui kakai kasiamh thau e kumna mi khou tei katiangc chanei lingclou e.

²Kamei rui khwmkih khang khouringh swluai the, drakhadui khou maruai louna kakhuihlou the; khatni kuakpaeng lamclou the.

³Kaidai tuang kauh liangmei bamv khou rui kumna kauh khang, kamei rui kabangcpui nunc ta ndiulou the:

⁴“Guang o, mpang nlomeithiu!” khatni mpangmei khou tei kamei rui sa e:

⁵“Guangna atuang taektw hei tu tho khatni ai rui kakhuihloumei drakhadui hei zangv tho.

⁶Mpangmei nunc ta mpatlouna ringc la tho. Ningting chaeng suic tat tho.”

⁷Sinnui sinnu bammeipu ta ncham e thei, nang zakmei ariw puni. Nang rui meicgay makmeipu ta luh ti thei, nang ta tikabiu puni.

⁸Sinnui sinnu bammeipu ta ncham riu; kamei nang ta karaeng puni. Tiki ningtyngpui mei ta nang rui luhlou ti thei, kamei nang ta champouhlou puni.

⁹Nang rui ningtyngmeipu ta nchamlou ti thei kamei ningtyng ranv kan puni. Ravchaptatmeipu ta nchamlou tio, kum e thei kamei thay mbu kan puni.

¹⁰RINGHPOUC ta pingmei hei ningting bangbi e. Nthanmei Racguangc ta thaymei hei kabah thaymei laatowmei bangbi e.

¹¹Ningting rui nang ringcting tisaengclou puni.

¹²Nang ningtyng e thei nang khang gaeng khang de, meic baihmei khang hamh e; nang rui ningting ta laazihna ganc e thei, nang khang amaanmei e.

¹³Mpangmei ntumei hei kara geic e; kamei tu zangv khang agaamv e khatni zak thay mak ge.

¹⁴Kamei kakai chaengmun khou dungcna, kaidai tuang kauh liangmei bamv khou dungcna,

¹⁵kaniw taanv khang lunghlouna tat bammei nunc khou tei mi kumna kauc e:

¹⁶“Guang o, ramhthay makmei nunc!” Mpangmeipu khou tei kamei rui sa e:

¹⁷“Houc zangvmei dui ndeih diangc e; houc tumei ntyan tu gay diangc e.”

¹⁸Mi khou tei theihmei nai e twmei kamei thay mak ge, kakai khou gut kanmei nunc tei taruaih syng khou bam the twmei kamei thay mak ge.