Read Rongmei Naga NINGTINGDYN 1 Bible Online

NINGTINGDYN 1 - Rongmei Naga bible

NINGTINGDYN 1

¹Mi hei David nac mpouh, Jerusalemmei guangc, Ningtyngmeipu rui saloumei latdyn e.

²Ningtyngmeipu tei rui sa khwan e, nsa de, nsa de, Ramh guayna nsa de.

³Maansei rui taancna ruaicna lunghmei hei rui tabui gaengmei tuang naina cho?

⁴Meickin meickin tat kan the, meickin meickin guang dat the, tiki kandih hei thu kalaic makna heikumna nai bam e.

⁵Neihmik hei pat the, key dat the, pat dat nimei bamv thangc tei key dat kan the.

⁶Mpwan hei ni dihpy aliu ngangh the, dihba aliu key the kumna aliu ngguic ngguic nganv lana hancguang dat the.

⁷Duithuak kathuicna hei duipui khou luangclou e, tiki duipui tei padik zat mak ge. Dui guay tei duithuak khou tei hancguang datna luangc kaluaih key dat the.

⁸Ramh guayna hei lak the—karam lak tei mwang rui sa dat ngam thay mak khe. Mik hei ni how pian zat mak ge, nu ni chu pian zat mak ge.

⁹Pat tang kanmei tei pat dat puni he. Taanc tang kanmei taanc dat puni he. Kandih khou hei ramh kathanc khat na sini maek ge.

¹⁰“Zauc tho, khou hei ramh thanc akhat nai the!” twna sa bam nuh e. Hei tei ni kathanc hamh e, aniu ta puanh mak khou pat tangmei tuang muay di the.

¹¹Reynungc pat kanmei tei gaanv khat na sini ningtow bam dat mak khe, kumna ntaw pat bammei hei thei thangc thu ningtow bam dat ni tuang hamh the.

¹²Ningtyngmei ai hei Jerusalem khou Isaraelmei tuang guangc swna lungclou the.

¹³Mi kandic nam ruc khou pat bammei ramh katana hei kathaina zauc ni the twna ai ning khwan the. Ravguangc rui maansei ruc khou ryanramei puatrith mphunlou the.

¹⁴Kandih nam ruc khou taanc bammei ramh katana hei ai how the, mi guayna tei nsa de. Hei tei mpwan ta nym khang nthau bampui riath de.

¹⁵Nkhuaimei ta tei sw-ntyng dat ngam mak khe; maekmei ta ni kasing phu dat nuh mak khe.

¹⁶Arana akhou kumna sa e, “Ai hei meicdaihmei the, ahu khou Jerusalem khou guangh swlou kanmei guay khang suangc sini ai hei ningtyng liang the. Ningting takh kiu tabui tei cho twmei ni ai thay the.”

¹⁷Ningtyngmei khatni mpangmei, mbamei twmei tabui tei cho twmei kathai khang ni alung dinglouna kathai the. Tiki hei tei ni mpwan ta nym khang nthau bampui riath de twmei laatow the.

¹⁸Ningtynglou ryanralou de; thay geiclou kabiu geiclou de.