Read Rongmei Naga NINGTINGDYN 10 Bible Online

NINGTINGDYN 10 - Rongmei Naga bible

NINGTINGDYN 10

¹Namhgaymei thauc haan tei theihmei simkui akhat na rui ti-namhsiloumei kumc, mpangmei tit na rui heidi ningtyngmei guay tei swmaan nuh e.

²Ningtyngmei rui nchumhmei taanv taanhmei khatni mpangmei rui nkhuaimei taanv taanhmei twmei hei kariak di the.

³Mpangpui mei tei thu chaengkui khou ariwmei ginpu khou nganvna kapang lyanlou puni, kamei mpangmei e twmei meic kathuicna khou tithay puni.

⁴Guangh rui nang ruc khou lunghpuamc pw e thei, nang tuang taanv nthaekc khang sw lari tho, reih reina bam ti thei daic sihmei khuay sini kuaklou nuh e.

⁵Guangh nunc rui nchumh makpui taanv taancna bammei ta ai how e.

⁶Lungcgaymei nunc ta ramh chaklou makna ganclouna mpangmei nunc khou ngamv daihmei bamv tiilou e.

⁷Saengcdaihmei nunc rui bangh kumcna phay rui tat, bangh nunc rui takuanh tuangc twna bammei ta ni ai how e.

⁸Kwam chaupui mei tei kwam khou keylou puni; ngaengsaengc swra gutpui mei tei nrui nchow puni.

⁹Ntauh taanv taanhpui mei tei ntauh rui kabiu puni. Thing taanv taanhpui mei tei thing rui kabiu puni.

¹⁰Mbwangmei, karu-ntukclou makmei nrih sin e thei lak mbu puni. Taanc nimei raeng tei kasiamhlou reymei hei ntakmei taanv e.

¹¹Nrui ta tei swpaguilou mak khou rui nchow rey e thei swpagui thaymei tuang gaengmei maek khe.

¹²Ningtyngmei nunc thu kaniw lat rui kaniw ta tichingkhiuhlou e, tiki mpangmei nunc thu kaniw rana kaniw lat rui kaniw ta sw kasic e.

¹³Kaniw tei mpangmei lat rui sa kahouhna mbamei lat rui luailou e.

¹⁴Mpangmei rui sa taan thay makna sa bam e. Theic thangc guang nimei ta meic gaanv khat na sini thay mak ge, khatni aniu theic tangmei tangv tabui pat puni cho twmei meic gaanv khat na rui sini aniu khou dinclou ngam mak ge.

¹⁵Mpang langvna kakai guang datmei chaeng sini thay makpui mei rui kapumc taanc kasic-karoucmei nganvna taanc puni.

¹⁶Alauc rui guangh swmei khatni kakandih kapy nunc tei ngay thangc thangcna bammei kandic tei sansimei kandic e.

¹⁷Kaguangh tei karana Latdyng dingkey ngammei, kakandih tuang kapy nunc tei kaganv chamei khou tuzangvmei khatni kaniw pumc sinriapmei khatni zouh zangv mba makmei hei kumhmei kandic tei sangay e.

¹⁸Aliauhmei kai tei tingzow e, kakai kainam ra key puni.

¹⁹Khumngai rui khatni zouh rui meic nunc ta tineihlalou e, tiki hei tei syan rui liumei tuang de.

²⁰Nang lung khou nganvna guangh ta khanh riu, nang kai kainung khou sini lungcgaymei ta nsih rio. Nang rui samei tei nruayna rui sini phungc tatna dinclou nuh e.