Read Rongmei Naga NINGTINGDYN 11 Bible Online

NINGTINGDYN 11 - Rongmei Naga bible

NINGTINGDYN 11

¹Kandih baih thangc lanvguanh khang nang tuang syan keylou o, zaeng neih khat thu gaeng guang puni.

²Nang tuang lanv tei kabamv mpeyna khou tiigutlou o, kalam thu mi kandic khou tabui tuang tasiat charimei guang puni cho twmei nang thay mak ge.

³Thingbang tei tabui bui biak pun bam sini, pun keylou loumei bamv khou tei zip bam kan ni the. Muangh tei padik pwkhou tingriu the.

⁴Nang rui tinggay neihgaymei na ta nkhwan bam ti thei nang napphwn key zat ni tuang hamh the, lau ni tay zat ni tuang hamh the.

⁵Ravguangc rui ramh katana damclou e, mpwan chaeng thay makmei kumc, meicpui akhat nahbamv khou ngana panty kahouh kanmei tei thay makmei kumcna Ravguangc rui taancloumei taanv guay tei aniu thay tangc ngam mak ge.

⁶Lauthwan ni tingzyn ni phunling lingc key o. Kaguayna tei thau chuyna thau ni ny thau lak ny, hamh e thei tabui tei rui gayna nthai puni cho twmei nang thay mak ge.

⁷Gaanhmei twmei hei gaymei tuang e, neihmik riw hei zauc pian mak ge.

⁸Nang khang tiiloumei tingkwm khang tei neihla zaenggay o, tiki nang panty khou ryanramei ganv mpeyna nai e twmei ningtow o.

⁹Chabwan nuncle nangniw panty tei amanvna lungc o. Chabwan swna bammei ganv khou hei neihlana lungc o. Nang rui taanc nii taanc niimei tei taanc o, nang lung rui kahaw hawmei tei taanc o. Tiki nang rui taancloumei guay tei Ravguangc rui latzan sw puni twmei thu ningtow o.

¹⁰Ramh khat na rui sini nang lung tiryanra riu khatni nang pumc ni tiryanra riu, nang tingsaengna chabwan swna lungc bam ni tuang hamh e.