Read Rongmei Naga NINGTINGDYN 12 Bible Online

NINGTINGDYN 12 - Rongmei Naga bible

NINGTINGDYN 12

¹Kumhpui zaeng rui nangniw chabwan swna bam khou, “Panty khou gaymei maek khe,” twna sapui ganv guangh tangh mak khou nang ta Damhmeipu Ravguangc ta ningtow o.

²Mi ganv khou kiu thu neih, bw, gaanchuangcna guay riw ni nkamv kan ni the, kumna ting muangc hei hacpat dat zat pw lak khe.

³Khou kiu thu nang ta gaek bammei baancpwam hei kadunh puni the, khatni ntaw tancna bammei nang phay nei hei nsuan key kan ni the. Nang tuang khaic nimei hu hei katit na puni the, nang mik ni ramh how nthan dat ngam pw lak khe.

⁴Nang nu tei chaengluang khou kachin bammei khwan sini chu dat pw lak khe. Paansowmei khwan ni chu nthan pw lak khe, ludowmei khwan ni chu pw lak khe, tiki nruayna lu rui nang ta nchyang thau puni the.

⁵Kabamv simei ta ping puni the, tinggiu makna tat dat ngam pw lak khe. Nang sam mphwan ngam kan ni the; nang pumc ta nganvna phungc tat lak puni the, kumna kahawmei guay maan kan puni the. Aniu tuang nkhamh liangmei zaengthaek bamv nzwan puni the, khou kiu meic nunc rui chaengluang khou kapna lwan bam puni the.

⁶Daandi tuangh pareiriang tap puni, kachaekc tamkuak bow keyna bak puni; duikhunc khou thaengc key bammei riang tei tapna duilai tei kasym paruat puni.

⁷Aniu tuang pumc hei kandih taniang guanh dat puni, khatni bumaengh hei tiiloumei Racguangc khou hanc guang dat puni.

⁸Nsa de, nsa de. Mi guay hei nsa de, twna Ningtyngmeipu rui sa the.

⁹Ningtyngmeipu tei ningting la mei zaeng rui kamei rui thaymei tei meic nunc khou dinclouna bam e. Kamei rui latkw guay kathaina mi guay tei nchumh e twmei ni nchanvna zauc the.

¹⁰Ningtyngmeipu rui nuhgaymei rana sa khang phu the, tiki kamei rui hy keyloumei lat guay hei kalingmei lat rana the.

¹¹Ningtyngmei nunc rui saloumei latkw guay hei lauziu gaenghmei nunc tuang ntukmei builwang kumh tuang e, khatni khuam kaduailoumei latkwdyn guay hei thing khou hianloumei zuatpi kumc ntipmei tuang e. Aniu kapwmna ta gaengcloumeipu Ravguangc rui mi hei tiiloumei tuang e.

¹²Anacle, ramh thay nimei lam baihmei akhat ni nai dat re. Latrik hy patmei hei kanganv maek ge, kumna kathai geic langv e thei nang pumc kabiu puni.

¹³Mi guay tangv hei salou dat nimei lam akhat na kha nai e: Ravguangc ta ping o kumna katuang latdanv guay tei piu o, kalam thu mi khang hei rui maansei ta Ravguangc rui damcloumei tuang e.

¹⁴Aniu tuang taanv kaguayna, simei ta ni gaymei ta ni, nkamhna taancloumei taanv guay ta nganvna Ravguangc rui latzan sw puni.