Read Rongmei Naga NINGTINGDYN 2 Bible Online

NINGTINGDYN 2 - Rongmei Naga bible

NINGTINGDYN 2

¹Mathac-malacna lungcna neihlamei kiu phu zauc ni the twna ai ning khwan e. Hei tei ni nsa de twmei ai laatow the.

²Nuihmei hei mpangmei tuang de, pumh mathac-malacmei rui ramh gaymei tuang swloumei tuang maek ge twmei ai laatow the.

³Zouh zangv lana neihlana lungc zauc ni the twna ai kakhanh khwan e. Duinamei kandih panty khou hei lungc nimei gay liangmei thak kiu mi hei khwang di the twna ai kakhanh khwan e.

⁴Ai taanvdaih taanvdaihmei taanclou the. Ai kai ni sw the, drakhalau ni kasiamh the.

⁵Ai tingthailau ni kasiamhna khou tei tingthai zaat guayna ni lingclou the;

⁶zeih chauna ni khou tei dui zay guanglou the.

⁷Ai aty-abangc mpeyna naina ni lungc the Jerusalem khou bammei meic guayna pang khou rui khouringh khounah nruaih geic liangmeipu swna ni lungc the.

⁸Ai rui sinmei kandic guay khou rui khuam guangmei daandi, kachaekc ni khuan nsuanglouna lungc the. Ata tineihla khang ntumei, nggaanvmei rui lu suanlouna lungc the. Ai rui kahawmei ntumei guay ta ni laana lungc the.

⁹Jerusalem khou lungcloumei guayna pang khou ai hei daic liangmeipu khwan the, khatni aningting hei kachac zat mak khwan the.

¹⁰Ai rui kahaw hawmei ai laatow khwan e. Pumh khou mathac-malac nuhmei guay tei ni kasutmei tuang maekna taanc the. Ataanv guay khang tei agaengh swbam khwan e, mi guay tei ataanv thai the.

¹¹Ntaw ai rui taanc kanmei guay tei kakhanh pwkhou khatni mi khang tei ai adih ranvna taanc kan cho twmei makumh pwkhou, mi guay tei kabah maek ge twmei ai thaypat the. Hei tei mpwan ta nym khang nthau bampui riath de gaengmei tuang maek ge.

¹²Tabui tabui swbam sini, guangh akhat rui kahu khou lungcloumei guangc nunc rui taanclou kanmei tei taanc kaluaih dat bammei tuang na de. Kumna ningtyngmei, mbamei khatni mpangmei twmei kiu tabui ta tei sih cho twmei ai kakhanh the.

¹³Ai thay the, “Gaanhmei rui zinghmei suangc gaymei kumc ningting hei mpangmei suangc gay mbu e.

¹⁴Ningtyngmei nunc rui thu kaniw tatlou nimei bamv tei thay e, tiki mpangmei rui thu thay mak ge.” Tiki theic nimei san thu meic kathuicna khang nai e twmei ai thay e.

¹⁵Ai arana kumna kakhanh e, “Mpangmei nunc san khou guanglou nimei tei akhou ni guanglou muay puni de. Kum e thei ai heikumna ningting bammei rui tabui gaengmei tuang naina cho?” “Nsa de,” twna ai kakhanh e.

¹⁶Ningtyngmei ta ni mpangmei ta ni meic gaanv khat na rui sini tingsaengcna ningtow bam ni tuang hamh e. Ningtyngmei ni mpangmei ni theic kan ni de.

¹⁷Kumna panty hei akhang nsa de, panty khou hei ryanramei hamhna baihmei maek ge. Mi guay hei nsa de, ai hei mpwan ta nym khang nthau bampui riath de.

¹⁸Ai rui taanclou kanmei taanv khatni ntaanv guangloumei guay hei akhang nsa de, kalam thu mi guay hei athei thangc lungc guang nimei khang ganclou kan nimei tuang de,

¹⁹kamei tei ningtyngmei puni ny, mpangmei puni ny thow thayna cho? Ai rui taancloumei guay khatni aningting rui mi kandic khou ntaanv guangloumei guay hei kamei katuang swkan nimei tuang di the. Mi guayna hei nsa de.

²⁰Kumna ai heidi ranvna taanclou kanmei khang tei ai lunghngiuc the.

²¹Nang rui nang tuang ningting takh khatni baanthai guay gutlouna taancpatloumei puat tei khat na sini taanclou makmeipu khang tei ganclou ducna tat kan nimei tuang de. Mi hei nsa de, khatni simei daihmei e!

²²Maansei rui ryanra lakna kapanty khou taancloumei tuang tei tabui gaengmei tuang naina cho?

²³Nang rui ringhsaanv taancna bammei tei rui ryanramei khatni meicpy mbahmei hamhna ramh baihmei khat na sini gaeng mak ge. Zingbangc nganvna nang lungning nthaekc makna sw bammei tei nsa de.

²⁴Nang khang gay liangmei thu tuna zangvna, nang rui ntaanv guangmei tei sinsw rapmei tei di the. Tiki mi hei ni Ravguangc khou rui guangmei tuang muay dyng e twmei ai ningtow dat re.

²⁵Kamei rui tiilou mak ge thei tuna neihla bam khang tabui thangc rui nai nina cho?

²⁶Ravguangc rui kata tipianpui mei khang tei ningting, takh khatni neihlamei tiilou e; tiki paapcmei nunc ta thu kaniw rui ntaanv guangloumei puat tei kata tipianloumei nunc khang tei tii khang taanv titaanc ranvlouna kaniw rui ntaanv guangmei tei tiry e. Hei tei nsa de. Mpwan ta nym khang nthau bampui riath de.