Read Rongmei Naga NINGTINGDYN 3 Bible Online

NINGTINGDYN 3 - Rongmei Naga bible

NINGTINGDYN 3

¹Kandih khou pat bammei ramh katana hei Ravguangc rui tiiloumei ganv khou pat bammei tuang e.

²Puanhpui ganv nai e, theihpui ganv nai e; lingckeypui ganv nai e, phuai ganhpui ganv nai e;

³swluaipui ganv nai e, tigaypui ganv nai e; rakeypui ganv nai e, kasiamh thaupui ganv nai e;

⁴kappui ganv nai e, nuihpui ganv nai e; zaengsipui ganv nai e, alaamhpui ganv nai e;

⁵ntauh ndat ganhpui ganv nai e, khuaic kaduai datpui ganv nai e; pamhpui ganv nai e, mpatpui ganv nai e;

⁶laatowpui ganv nai e, amaanpui ganv nai e; khuam kaduailoupui ganv nai e, ndat ganhpui ganv nai e;

⁷siatkaekpui ganv nai e, hui kariupui ganv nai e; reih reipui ganv nai e, lat sapui ganv nai e;

⁸nzianpui ganv nai e, karaengpui ganv nai e; suc-rih swpui ganv nai e, nchu-nzaenghpui ganv nai e.

⁹Taanhmei rui tabui gaengmei tuang naina cho?

¹⁰Ravguangc rui maansei ruc khou nritmei taanv puatrith mphunloumei ta ai thay e.

¹¹Kamei rui ramh katana khang chamei ganv tiilou e. Thei thangc guang nimei ta thay niimei chwn aniu khou kamei rui tiilou e, tiki kamei rui taanc bammei tei thay nthan thiakna pian rap khang tiilou mak ge.

¹²Kumhpui zaeng rui aniu khang gay liangmei kiu thu neihla rapna aniu ringc bammei dak khou taanclou nuhmei gay liangmei tei taanclou rap twmei hei bu di the twmei ai thay the.

¹³Aniu rui tuna zangvna taancpatloumei guay hei pianna sinswna lungc nina de. Mi hei Ravguangc tuang kaipat re.

¹⁴Ravguangc tuang taanv guay hei tingsaengzaeng nai puni twmei hei ai thay e. Nang rui hei khou tei ramhkhat na sini haaplou nuh mak ge, laa ganc ni laa ganc nuh mak ge. Ravguangc rui sw bammei akhat kiu thu aniu rui kata ping khang e.

¹⁵Pat bammei khatni pat nuhmei kaguayna hei kahunungc pat tangmei rana di the. Ravguangc rui ramh guayna hei kaluaih kaluaihna tipat bammei tuang de.

¹⁶Hei guay ruc khou rui, mi kandic khou hei nchumhmei sw nimei bamv khou tei nkhuaimei sw bammei tei ai how e.

¹⁷Ai kumna kakhanh e, “Ravguangc rui nchumhmei ta ni simei ta ni latzan sw puni de, kalam thu ramh kaguayna khang kamei rui kaganv kaklouna bammei tuang de.”

¹⁸Aniu hei khouringh nunc kumc rapmei tuang de twmei aniu khou lyanlou khang Ravguangc rui aniu ta chaengc zauc bammei tuang e twmei ai thaypat the.

¹⁹Nganvmei khou, theihmei twmei hei khouringh khang ni maansei khang ni nkhwanna bammei tuang di the. Khouringh ni maansei ni nchamc di the. Maansei rui gay mbu rapmei tuang maek khe, kalam thu maansei khang ni khouringh khang ni panty hei kabah maek ge.

²⁰Maansei ni khouringh ni taniang khou rui guangna taniang khou hanc dat puni.

²¹Maansei bumaengc kauh ku, khouringh bumaengc rui kandih bangc key tw e twmei akumhna nthanna thayna cho?

²²Kumhpui zaeng rui aniu khang gay liangmei thu aniu rui taancpatloumei guay hei pianna sinsw rapmei tei rui gay liangmei di the twmei thay the. Kalam thu hei tei kasan khang swlou tuang di the. Aniu theic tangmei tangv tabui sw puni cho twmei thay nuhmei chaeng maek ge.