Read Rongmei Naga NINGTINGDYN 4 Bible Online

NINGTINGDYN 4 - Rongmei Naga bible

NINGTINGDYN 4

¹Mi kandic khou pat bammei nchumh makmei kaguay tei ai zauc dat re. Rairiu khaengvmei nunc kapna bam e, meic gaanv khat na sini kaniw ta nkhavlou mak ge. Meic gaanv khat na sini nkhavlou ngam mak khe. Kalam thu rai bammei nunc tei kaniw khou ngamv nai the.

²Theic tat kanmei nunc ta tei ai mamav e, ringc bammei nunc khang suangc kaniw khang gay the.

³Puanc pat makmei nunc, mi kandih khou nchumh makmei sw bammei guay ti hei how tow makmei nunc tei gay ranv the.

⁴Maansei rui ramh akhat khang heidi ranvna karamc bammei hei kakainingmei ta mamavmei zaeng rui de twmei ni ai thay the. Tiki hei tei nsa de. Hei tei mpwan ta nym khang nthau bampui riath de.

⁵Kabaanc nsuina ndaapc khaengvna theihpui mei tei mbamei de twna kaniw rui sa e.

⁶Kum bam nuh e, tiki mpwan ta nym khang baanh nei kazaapcna tynna bammei suangc katit na nai sini lungning khou nchu-nzaenghmei naina lungc bammei tei rui gay e.

⁷Maansei panty khou gaeng makmei baihmei ni ai how the.

⁸Kanac ni, kachana ni maekmei karana lungc bammei gaanv khatpu kakhou naimei lanv ta tei pian makna taanc rapna bammeipu gaanv khat nai e. Kamei thow khang heidi taanc ranv bam tu cho? Hei tei nsa de si kanmei panty kiu the.

⁹Gaanv khat na suangc gaanv nei rui gay e, kalam thu gaanv nei rui tanc mbu e.

¹⁰Gaanv khat bow sini, gaanv khat rui zaythau dat nuh e. Karaanameipu tei bow e thei, si hak puni the, kata zaythaulou dat nimei meic maek khe.

¹¹Asik khou sini gaanv nei zip be thei lumc e, gaanv khat na thu akumhna swlumc nina cho?

¹²Zauczihmei ta karana rui akhangv ngam lakmei tei gaanv nei e thei ngam e. Kalw kathumh kasiatcmei riang tei swtap kungc e.

¹³Gaanvthaih bam sini mpanglangvna meiclat laathay makmeipu khang suangc lungcsimei alauc ningtyngmeipu swmei rui gaeng e.

¹⁴Chabwan tei lungcsimei guangcdic khou rui puanhmei hamh e thei kang bammei khou rui ni patna guangh swbam nuh de.

¹⁵Kandih khou lungc bammei maansei guay ta ai chakna zauc the, kumna kabamv akhat khou kaniw pang khou rui chabwan gaanv khat guanghbamv nsin nimei gaanv khat ta thay the.

¹⁶Guangh akhat rui sinmei maansei hei kasing kanganv nai mak bam nuh e, kamei theic kan pwkhou thu kamei rui taancloumei taanv khang tei meic gaanv khat na rui sini thuancku bam dat pu lak khe. Hei tei nsa de. Mpwan ta nym khang nthau bampui riath de.