Read Rongmei Naga NINGTINGDYN 5 Bible Online

NINGTINGDYN 5 - Rongmei Naga bible

NINGTINGDYN 5

¹Nang Ravkai tat pwkhou swriakthayna tat ro. Mpangmei, nchumhmei laanhmei thay makmei nunc rui khaeng bammei kumcna khaengmei suangc ncham khang tatmei rui gay de.

²Nang sa nimei lat tei kakhanhna sa o, kakhanh makna Ravguangc khou latdyng sw riu. Kamei thu tingkauh thangc bammei e, kumhpui zaeng rui sa twan sa lyam riu.

³Nang lung ryanramei geiclou nang mang si geicloumei kumna sa geiclou mpangmei sapat geiclou e.

⁴Nang rui Ravguangc khou latdyng swlou kan e thei hei tei nuhmei kamv katumcna taanc o. Mpangmei ta kamei kahaw mak ge. Nang rui taanc ni twna nrianhlou kan e thei taanc o.

⁵Latdyng swlouna taanh makmei suangc thu latdyng sw makmei rui gay de.

⁶Nang tuang latsav rui nang ta paapc khou tikeylou riu. Ravguangc tuang amuh khou “Ai latdyng swloumei tei nkhuai the,” twna sa khang sw lario. Tabui swna Ravguangc lungpuam ntanv bam nina cho? Tabui swna nang tuang taanv tei Ravguangc rui swmaan khang swbam nina cho?

⁷Nang mang azuh manv bam kan diu, gaeng makmei taanv azuh taanc bam kan diu, lat azuh ni sa bam kan diu, nang Ravguangc ta thu ping nina de.

⁸Kandih kaipouc nunc rui lungcsi lungcroumei ta rairiu pwsini khatni kaniw khang swlou nimei thouc tei swlou makna kaniw khou nchumhmei swlou mak bam pwsini nang ngak bam riu. Meicdaihmei kathuic ta tei karuc khou bammeipu rui zauc bammei tuang de, khatni kaney ruc khou ni kauh ranvmei naina zauc bammei tuang di he.

⁹Guangh nganvna nap-bi khou ngangvlouna bammei tuang de.

¹⁰Nang syan ta kahaw e thei, nang tabui nungc na sini pianmei nai zat ni tuang hamh e, nang lungcgay chingkhiuhna lungc niina ning e thei, nang rui kahawmei guayna tei nang laatow ngam ni tuang hamh e. Mi hei nsa de.

¹¹Nang lungcgaylou, tu nimei mwang geiclou puni de. Nang khang gaengmei kiu nang lungcgay the twmei khang na tei de.

¹²Taanvtaanhpui mei tei kabung biuc nai bam ni nuh e, mak bam ni nuh e, tiki kamei zip chuyna zip ngam e. Lungcgaypui mei tei ramh guayna nai tiki zip chuyna zip ngam mak ge.

¹³Kandih nam ruc khou si sihmei ramh akhat ai how the: meic nunc rui kaniw kage naimei ganv khou sinsw khang twna ry kaduailoumei syan tei

¹⁴san sina amaan dwang tat kan the, kaniw nac nunc khang ramhkhat na sini ganclou duh khang maekna taan the.

¹⁵Aniu azuh taanc ruaicna bam sini aniu kandih khou pumtang guangmei kumcna ramhkhat na sini phungh makna tat dat puni de.

¹⁶Mi hei ni si sihmei tuang akhat the! Aniu lungc guangmei tei kumcna tat dat the. Aniu mpwan ta nym khang nthauna karamc nganv lana aniu tabui laatowna cho?

¹⁷Aniu tuang panty hei zinghmei khou zaengsina, ryanrana, lunghpuamcna, sucnu-naunianna lungc the.

¹⁸Ravguangc rui aniu khang tiiloumei duimei ganv khou hei aniu rui taanc patmei guay hei tuna zangvna amanvna lunghmei rui gay liangmei tuang di the twmei laatow the. Mi hei Ravguangc rui tiiloumei tuang maansei san khou damcloumei tuang di the.

¹⁹Ravguangc rui syanlanv khatni puatchei tiilouna hei tei sinsw khang tiilou e thei, thuanckuna kamei rui taanc patloumei tei sinsw rap nina the. Mi hei Ravguangc tuang kaipat re.

²⁰Ravguangc rui kata neihlana lungh khang swloumei zaeng rui panty heidi dui bam sini neihlana lungc puni.