Read Rongmei Naga NINGTINGDYN 6 Bible Online

NINGTINGDYN 6 - Rongmei Naga bible

NINGTINGDYN 6

¹Maansei khang nrit hakmei simei akhat ni ai how e.

²Ravguangc rui gaanvsaekc khang lanv, chakhwang champouhmei, khatni puatchei, ngguay, kamei rui kahawmei kaguayna tiilou e, tiki kata mi kaguay tei tipiutow mak khe. Hei tei meic baihmei gaanv khat rui piu kan the. Hei tei nsa de, khatni nchumh mak ge.

³Thowkumhmei rui kapanty lungsingna, kanac 100 puancna lungc bam sini kamei neihlana lungh mak ge thei khatni mbeih chuyna mbeihlou mak ge thei, mi kumhmeipu tei suangc mu theicna puanc patmei ngana rui sini gay e twna ai sa nii e.

⁴Ngana hei maansei swna puanc pat makmei twmei hei gaymei hamh e, hei tei zinghmei khou amaanlouna amuclou kan the.

⁵Mi nac tei kalaanv riw how zat kan mak khe khatni panty kiu tabui kumh cho twmei ni thay kan mak khe, kum bam sini kamei thu zaeng nthaekcmei na thu ariw kan de.

⁶Tingkwm 2000 lungc bam sini kapanty khou amanvmei ariw makmeipu tei suangc mu nabungmei nac tei rui gay e. Nkhamh khou thu kabamv akhat na khou guang kariulou dat kan nimei tuang de.

⁷Maansei gaanv khat rui kabung khang na taancna lungc e, tiki tu biuc zat mak ge.

⁸Akumhna ningtyngmei rui mpangmei suangc gayna cho? Panty khou kunghmei guay ti hei akumhna akhangvna lungc nina cho twmei lungcsimeipu tei rui thaymei hei tabui gaengmei naina cho?

⁹Hei tei nsa de, mpwan ta nym khang nthau bampui riath de ramh kahaw rapna lungc bammei suangc thu nai naimei khou tei pian rapna lunghmei rui gay e.

¹⁰Pat bammei kaguayna hei pat diu khang rey khou rui swlou tangmei pat bammei tuang de, kumna maansei akhat rui kasuangc tanhmei ta agi ngam mak ge twmei aniu thay e.

¹¹Agi saengclou gay maklou di the, hei tei rui gaengmei maek khe.

¹²Meicmaengcna kumcna amaan nuangc kanmei dui kanmei nsa maansei panty khou hei tabui tei rui gay liangmei cho twmei akumhna thay nina cho? Maansei hei kamei theic key pwkhou akumh puni cho twmei akumhna kamei thay nina cho?