Read Rongmei Naga NINGTINGDYN 7 Bible Online

NINGTINGDYN 7 - Rongmei Naga bible

NINGTINGDYN 7

¹Zanh gaymei twmei hei kamanv kunghmei mwnduithauc suangc sini gay e; theihmei tingmik hei puancpatmei tingmik suangc sini gay e.

²Khumngaimei kai khou tatmei suangc theic-suhmei kai khou tatmei rui gaeng e, kalam thu theihmei hei aniu meic kathuic ta nkhwan bam e twmei ringc bammei aniu khou tiningtowlou e.

³Lungh ryanramei rui nuihmei suangc gaeng e, hei tei rui nang zaw thu tikamvlou nuh e tiki kabah thaymei thu ti-mbulou e.

⁴Neihlamei na ta kakhanhna bampui mei tei mpangmei e. Ningtyngmei rui kamei theic nimei ta kakhanh e.

⁵Ningtyngmei maansei rui nang ta luhmei tei mpangmei maansei rui thuancna suanloumei suangc gaeng e.

⁶Mpangmei rui nuihmei hei mai khou sauh puak pariakh riakloumei tei kumh tuang de. Hei tei kabah maek ge.

⁷Ningtyngmei akhat rui meic gaanv khat ta namna laamei hei kamei mpangmei tuang taanv taanhmei e, lanvbiwmei hei, maansei lung ti-mphuam e.

⁸Ramh katana luailoumei twmei hei kahouhmei khang suangc gay e. Khaengvsaenghmei rui gaengh swmei suangc gay e.

⁹Nang lunghpuamc katumc riu, kalam thu lunghpuamc bammei tei mpangmei e.

¹⁰“Tabui sw tina ramh guayna rey khou tei rui gay mbu bam tu cho?” twna thanv riu. Mi hei ningtyngmei lat hamh e.

¹¹Ningting laatowmei twmei hei lanv laatowpui riath re; ringhmei maansei katana rui ningtyng nimei thouc e.

¹²Mi hei syanlanv rui aniu ta nkhav kumc nkhavlou nimei tuang e. Ningting rui nang ta kanlou puni ningting rui gaeng mbumei twmei kiu hei tei the.

¹³Ravguangc rui taancloumei taanv ta tei kakhanh zauc o. Ravguangc rui swkadip kadaengvloumei ta tei thow rui akumhna sw ntyng dat ngam nina cho?

¹⁴Nang khang ramh guayna gayna tat key bam e thei neihla tho, tiki ryanramei guang pwkhou mi hei ningtow o: Ravguangc rui neihlamei ni ryanramei ni tiiguangmei tuang de; thei thangc tabui guang dat puni cho nang thay mak ge.

¹⁵Apanty hei kabah maekmei panty sw khwan sini mi lungc khou hei ramh katana thu how the. Meicgaymeipu tei rui theic, meicsimeipu tei rui ringc bam twmei ni how the.

¹⁶Hei zaeng rui gay langv riu, ningtyng langv riu—tabui swna nang rana nang ta swluai bam nina cho?

¹⁷Tiki meic ni si langv riu, mpang ni mpang langv rio—tabui swna nang theic biuh mak khou theic bam nina cho?

¹⁸Ravrian twanmei twmei hei sw riu. Ravguangc ta pingna lungc e thei ravrian twan makna lungc puni.

¹⁹Guangh ruh rui kaidai akhat khang taancloumei suangc ningting rui meic gaanv khat khang taancloumei tei mbu e.

²⁰Nkhuai zat makna nchumhmei na taancna lungc bammei kandih nam ruc khou maansei khat na sini maek ge.

²¹Meic nunc rui samei lat kaguayna tei nking riu nang bangc rui nang ta sa kasicmei lat ni chu pwng e,

²²kalam thu nang rui meic baihmei ta tizaklou geic sih kan the twmei nang rana thay e.

²³Aningting sinswna ai mi guay hei kathai zauc the. Ai ningtyngmei e twna kakhanh e, tiki ai ngam mak khwan e.

²⁴Panty tuang kabac hei thow rui thay ngam nina cho? Mi hei nthuk langvna thay ngam mak ge, kungc langvna thay tangh mak ge.

²⁵Ningting phumei khatni ramh kathaimei khou lungh gutlou zauc the; ningting kiu tabui tei sih cho khatni ai rui thay tangh makmei lam azuh tei akumhna thay nina cho, khatni mpangmei twmei rui adihkamv mpang tu cho khatni sina taanh tu cho twmei phu zauc the.

²⁶Theihmei khang suangc sini simei ai rui ariw khwan e mi kiu thu ntumei e. Kamei rui nang khang tiipatmei ramzian tei rui nang ta phah kumcna manc puni, nang ta kabaanc rui pamc bammei tei rui pareiriang kumc bangclou puni. Ravguangc ta tipian bampui mei tei mi pui khou tei rui duak puni, tiki kamei rui paapcmei ta nym puni.

²⁷Heikumna ai kathaina bammei lungc khou mi guay hei katit katit na hei kumna thay patmei tuang the twna Ningtyngmeipu rui sa the.

²⁸Baihmei akhat ni ai phu dat re tiki hei tei phutow mak ge. Maansei 1000 lungc khou chakhwang swlou nuhmei hei nggaanvmei akhat na thu phutow e tiki ntumei thu gaanv khat na sini ariw mak ge.

²⁹Ai rui laatowmei kiu mi hei the: Ravguangc rui aniu ta chiwna, samna lungh khang damclou e tiki aniu rana rui aniu ta swkungclou the.