Read Rongmei Naga NINGTINGDYN 8 Bible Online

NINGTINGDYN 8 - Rongmei Naga bible

NINGTINGDYN 8

¹Ramh kaguayna tuang kabac hei ningtyngmeipu na rui thay e. Ningting rui kazaw tigaanclou e khatni kazaw zinghmei tikalaiclou puni.

²Guangh latdanv tei piu o, khatni Ravguangc khou riu riuna latdyng sw riu.

³Guangh thu kamei rui sw nii niimei sw nuh e, kumhpui zaeng rui kahu khou rui ducna bam o; hei kumhmei kabiu nuhmei bamv khou tei bam riu.

⁴Guangh tei kangamv khou taanc bammei tuang e, kamei rui taanc bammei tei meic gaanv khat na rui sini lat nchyan bam nuh mak ge.

⁵Katuang latdanv guay tei nang piu bam e thei nang kabiu lak ge; ningtyngpui mei rui ramh guayna taanc nimei ganv khatni taanc nimei thak thay e.

⁶Ramh kaguayna taanc nimei tuang ganv khatni taanc nimei tuang thak nai e, tiki aniu thu katit na thay e!

⁷Thei thangc guang nimei ta meic gaanv khat na sini thay mak ge, aniu khou dinclou nimei ni meic maek ge.

⁸Meic gaanv khat na sini kata titheic mak ngam mak ge, kamei theic nimei tingmik ni tikasuanh ngam mak ge. Mi hei aniu rui leyduak nuh makmei ricbamv di the; mi khou tei rui guatna pakduak ngam mak ge.

⁹Mi kandih nam ruc khou taanc bammei kaguay ta ai kakhanh pwkhou mi guay hei ai how the. Mi kandih khou gaanvsaekc rui ngamv sin e kumna gaanvsaekc rui ngamv sinmei nunc baanc bangc khou ryanra akhaengv e.

¹⁰Meicsimei nunc ta kaniw tuang tarou khou mbeihlou bammei ta ni ai how the. Kumna meic nunc tei tarouluangc thangc rui guang datmei chaenglwan khou kaniw rui simei taanv taanc kahakloumei kaidai khou meic nunc tei rui kaniw ta thuancna sa e. Mi hei nsa de.

¹¹Tabui swna meic nunc rui tasiat-chari taanv heidi katupcna taanc bam tu cho? Kalam thu simei taanhmei nunc ti hei katumc katumcna latzan sw timakna e.

¹²Paapcmei gaanv khat rui simei taanv 100 taanc bam sini ringcna bam e. Ngguay, kaniw rui kumna sa bammei ta ai chu e: “Nangniw rui Ravguangc lat piu tithei, ramh guayna gayna bam kan nimei tuang de.

¹³Tiki meicsimei khang thu ramh gaymei ariw ni tuang hamh the. Kaniw tuang panty hei thu meicmaengcna kumhmei tuang de, kaniw chabwan swna theic puni, kalam thu kaniw Ravguangc lat piu mak ge.”

¹⁴Tiki mi hei kabah maekmei lat de. Kandih khou pat bammei guay hei zauc lo: Kaluan luan ravchaptatmei nunc tei meicgay makmei nunc tuang dandi ariw e khatni meicsimei nunc tei ravchaptatmei nunc tuang swan laa e. Mi hei nsa de twna ai rui sa e.

¹⁵Maansei hei amanvna lungc nina de twmei ai laatow e, kalam thu kandih nam ruc khou hei tuna zangvna amanvna lunghmei suangc gay mbumei maek khe. Ravguangc rui kandih khou tiiloumei panty khou hei taancna tuna zangvna amanvna thu lungclou nuh e.

¹⁶Ningting paan rui mi kandic khou pat bammei guay ta thay khang zingbangc kalaanv karamc bam sini

¹⁷Ravguangc rui mi mbaanv khou hei tabui pat puni cho twmei thaymak khang kasiamh tang kanmei di the twmei e. Nang rui ranvsihna karamc bam sini thay zat nituang hamh the. Ningtyngmei nunc rui aniw thay e tubam sini kaling kiu thu thay ngam ni tuang hamh e.