Read Rongmei Naga NINGTINGDYN 9 Bible Online

NINGTINGDYN 9 - Rongmei Naga bible

NINGTINGDYN 9

¹Ai mi lam guay hei tingsaengcna khatni ranv sihna kakhanhmei tangv ai how the twmei thu Ravguangc rui ningtyngmei khatni ravchaptatmei nunc taanv, kaniw tuang nzianmei khatni karaengmei khou nganvna Ravguangc baanc rui zaylou bammei tuang e. Thei thangc guang nimei ta meic gaanv khat na sini thay mak ge.

²Ramh baihmei tuang maek ge. Ravchaptatmei khang ni, meicsimei khang ni; meicgaymei khang ni, gay makmei khang ni; ravningmei khang ni, ravning makmei khang ni; ravkhaeng bammei nunc khang ni, khaeng makmei nunc khang ni theihmei twmei hei thu guanglou kan nimei tuang di the. Meicgaymei khang e na paapcmei khang suangc gaeng mbumei tuang maek khe; syangdyng swmeipu tei rui sw makmeipu khang suangc gaeng mbumei tuang maek ge.

³Meic kathuicna khou theihmei twmei san hei thu nchamcna nai bammei tuang di the, kumna mi hei kandih nam ruc khou nchumh makmei tuang pat bammei pang khou akhat muay the. Maansei rui ringc bam saanv kaniw lung khou tei simei khatni mbamei rui padik ge, kumna thay mak daekna theic the.

⁴Tiki ringhmei kandic ramc khou hei ringcna bammei nunc khang thu diwgaymei twmei asaekc na thu naina ringc bam e ringhmei si hei theihmei kamangliangpui suangc thu gay e.

⁵Ngguay, ringhmei nunc hei thu kaniw theic puni twmei thay e, tiki theihmei thu ramhkhat na sini thay mak khe. Kaniw swan mbumei maek khe; kaniw ti hei amucpary the.

⁶Kaniw khou naimei lev theic bin kan the. Mi kandic khou pat bammei ramhkhat na khou sini kaniw kazauh dat ni tuang hamh the.

⁷Tuna zangvna neihla zaenggayna lungc tho. Mi hei Ravguangc rui nuhmei e.

⁸Kaganv kathuicna khou neihla zaenggaymei lwn lyanna bam o.

⁹Ravguangc rui nang khang mi kandic tuang kabah maekmei panty hei tiilouna bammei dak khou nang now lev mbaanvthayna lungc o. Gaeng makmei tingmik kathuic khou amanvna lungc o, kalam thu ryanrana lunghmei panty lungc khou hei nang khang gaeng nimei twmei kiu mi hei na di the.

¹⁰Nang rui taanvtaanhmei taanv tei thu ranvna taanc tho, kalam thu nang rui tat nimei theihmei kandic thangc tei taanhmei, kakhanhmei, thaymei, ningting twmei guay hei nai dat lak khe.

¹¹Baihmei akhat ni ai thay dat re, mi kiu thu mi kandic khou hei pak tanhmei rui lauluangc pak khou ngam tanh tan mak ge. Ningtyngmei nunc ni tu khang nai tanh tan mak ge, ntakmei nunc ni lungcgay tanh tan mak ge, khatni ramh ngammei nunc ni bamv kauhmei khou ku tanh tan mak ge. Meic guayna khou san naimei tuang de.

¹²Nang tuang ganv tabui nungc guang puni cho twmei nang thay mak ge. Nruayna ta phah khou manh kumc, khav ta chiakc rui manh kumh, aniu rui lwm makmei ganv khou simei tei aniu khou phah nkhap kumcna keylou pw nimei tuang de.

¹³Baihmei akhat ni ai how e, mi kiu thu kandih khou hei ningting hei adih nthuk cho twmei tuang pat kanmei tuang lyanmei akhat re.

¹⁴Meic geic sihna lungh makmei kaidai launa akhat nai bam khwan e. Ngamv naimei guangh akhat rui mi kaidai khou tei rih keyna dingbin the kumna raengh tei swra gut khang sw bam the.

¹⁵Mi kaidai khou tei lungcsimeipu, tiki kaningting naina mi kaidai ta tei kanlou ngam nimeipu gaanv khat lungc bam khwan e. Tiki meic gaanv khat na sini kata ning pat mak khwan e.

¹⁶Ningting hei pumtan suangc gaeng e twna ai sa tanh tanna bammei tuang the, tiki lungcsimeipu ta tei meic gaanv khat na rui sini ningtyngmei e twna laalou mak ge khatni kamei rui samei tei nkinglou mak ge.

¹⁷Mpangmei nunc peikai khou guangh rui kaucna bammei tei nkingmei suangc ningtyngmeipu rui nchu rih rihna samei tei nkingmei rui gay e.

¹⁸Ningting rui rih na suangc gaeng e, tiki paapcmei akhat rui gaymei mpeyna ta swkasiclou e.