Read Rongmei Naga SOLOMON LU 1 Bible Online

SOLOMON LU 1 - Rongmei Naga bible

SOLOMON LU 1

¹Solomon rui phuakloumei lu guayna khou rui gay liangmei lu kiu mi hei e.

²Nang mwang rui ata kaputlou e; nang ramzian hei drakhadui suangc sini ndeih e.

³Nang daeng khou hei thauh rym rui padik the; nang zanc hei namhgaymei thauc haan bun pat kumc e. Ntumei gaanv khat na sini nang ta nzian mak ngam mak ge.

⁴Ata nduangh tat ro, anei pak tat kho; nang rui atuang guangc swlou o, nang kai khou phungc guanglou o. Anei neihla nchamc kho, drakhadui zangvmei khang suangc neihla mbu kho. Ntumei guay rui nang ta nzian e!

⁵Jerusalemmei luc nuncle, ai hei miw sini tunac gay e, Kedar sypungramv tuang pheykai kumc miw e, tiki Solomon tuang guanghkai khou katinghloumei khamthinghphey kumc e.

⁶Ata miw e twna mala riu, neih rui phauc miw tuang de. Apuningc nunc rui ata lunghpuamcna drakhalau titaanc the. Apumc kasiamh karuaihmei ganv maek khe.

⁷Akhou dinclou o akhaamvpule, tabui khou nang tuang lauziu pang tei kataek titu khang gaengclou nina cho? Kalaanv neic thiu khou rui tabui khou kaniw ta ti-nthaekclou nina cho? Tabui swna baihmei lauziu pang khou nang ta phu tat bam nina cho?

⁸Ntumei pang khou rui kalwn gay liangmeile, nang mi bamv tei thay makna cho? Lauziu pang thei tei lay suic tho; lauziu gaenghmei nunc tuang pheykai daeng khou nang tuang ziuc pang ta gaengclou tho.

⁹Amwnpuile, Pharao tuang gari zaymei takuanhchic ta kanay rui tineihlamei kumc, nang rui nggaanvmei guay ta tineihla e.

¹⁰Nang sam nang biangc khou zow keymei tei howgay e, nang guang khou ntuh kumc ban keymei tei.

¹¹Tiki aniw rui nang khang kachaekc pareiriang kasiamhlou puni, daandi rui karuhlouna.

¹²Aguangc tei kalaeng khou zip bam khwan e, atuang thauc rym rui kainung padikna.

¹³Akhaamvpu tei agaw rym rui padik khwan e, kamei angaengv khou zipna.

¹⁴Akhaamvpu hei nwmbangc mwnpwang kumc e, Engedi tuang drakhalau khou puanghmei pwang kumc e.

¹⁵Amwnpuile, nang lwn adih gay cho; nang mik khou nzianmei mikhwan nai e!

¹⁶Nzian liangmeile, nang hei adih nggaanv gay cho; nang rui ata adih tikahaw cho! Mphuaih ndiakcmei rui laeng sw puni;

¹⁷Sidar thing rui kaiphuang sw puni, saipres bang rui siling sw puni.