Read Rongmei Naga SOLOMON LU 2 Bible Online

SOLOMON LU 2 - Rongmei Naga bible

SOLOMON LU 2

¹Ai hei Sharon nzaengc tuang mwnpwang e, chyng nzaengc khou puanghmei lili e.

²Sauh ding khou puanghmei lili kumc amwnpui hei tunac pang khou puangc bam e.

³Thingbang ding khou appal bang thau kumc ai nzian liangmeipu rui nggaanv pang khou thau bam e. Ai kaswng bangc khou dungc bam nii e, kathai tei ndeih gay e.

⁴Kamei rui ata katuang khwmkih kai khou phungc guanglou e. Kumna katuang nzianmei chuangcphey aruc khou zaythaulou e.

⁵Drakhathai rui apumtan titanclou e, appal thai rui azaeng titanclou e ai hei nzianmei rui nsuankeyna bam khou!

⁶Kabaanc baandau khou apyban swna kabaanc baanzat rui kathupclou e.

⁷Jerusalem luc nuncle, akhou latdyng swlou o; asanhnay lev sangai ta pancna siangdyng swlou o, aney nzianmei ti hei swkaguakc lak ge twna.

⁸Ai akhaamvpu khwan chu e. Kamei luanghbut guay ruc khou pak guang the, chyngbut guay pak kaanna akhou pak guang the.

⁹Akhaamvpu hei sangai hamh e, thei chakhaengvchic launa kumc e. Kamei ngaensaengc daeng khou ding bam e. Kamei kailat khou rui ntyn gut the, phoukai khou rui phaengc gut the.

¹⁰Akhaamvpu rui ata kachuc the. Amwnpuile, guang tho; athei lay tho.

¹¹Tingsei luai the; ting riu taan the;

¹²ramvpuk khou mwnpwang guay puangc bam the. ntaw thu lu suanmei ganv di the; ramvpuk khou akhouhna khwan rui padik the.

¹³Tadutthai minc pat pu the; drakha pwang rym rui namh padik the. Amwnpuile, guang tho, athei lay tho.

¹⁴Nang hei khow lap khou dup bammei akhouhna kumc e. Howgaymei nang zaw tei akhou lyanlou o. Nuhgaymei khwan tei tichulou o.

¹⁵Asacsi nunc ta tei, asacsi lau launa nunc ta tei nym tho, puangc bammei anei tuang drakhalau sw kasic mak khou.

¹⁶Ai nzianmeipu hei atuang e, ai hei katuang e. Kamei rui kalauziu pang ta lilipwang ding khou gaengclou e

¹⁷lauthwan pwan aliu mak saanv, zinghmei tat kaan mak saanv. Akhaamvpule, sangai hamh e thei Bether chyng tuang chakhaengv kumcna guang dat ro.