Read Rongmei Naga SOLOMON LU 4 Bible Online

SOLOMON LU 4 - Rongmei Naga bible

SOLOMON LU 4

¹Amwnpuile, nang lwn adih gay cho! Pheybangc khou nang mikhwan tei mangui rui padik ge. nang sam hei ziuh pang kabaih kumc e, Gilead chyng khou kachuamh keymei kumc e.

²Nang huc hei kahiw tiapna duilow nthanloumei lauziu kumc mphuan e. Kachacmei maekna thau bangh bang e, kaguayna tei nthuih thikh thik ge.

³Nang chy hei haengcnrymmei pheyriang kumc e, nang lat sa pwkhou adih howgay cho! phey lungc khou nang biangctau tei adih gaanc kah ka cho!

⁴Nang guang hei David tuang rihphaankai kumc kabungc tungh tung, ndiau dikh dik ge. Nang tuang tuc tei nggih thaengc padiklou kumc e.

⁵Nang ngaengv tei sangai dingdac bam kumc e, lili ding khou asanh kataek binctu dac bam kumc e.

⁶Ai agaw chyngbut khatni karym namhgaymei luangcbut khou tei bam nii e, lauthwan pwan aliu guang mak saanv, zinghmei tat kaan mak saanv.

⁷Amwnpuile, nang lwn hei adih gay cho; nang hei adih nthuih cho!

⁸Amwnpuile, Lebanon chyngbut khou rui athei lay guang o; Lebanon khou rui lay guang o. Amana chyng twan khou rui key o, kamangliangpui khatni alaih pang bamv Senir chyng khatni Hermon chyng khou rui key o.

⁹Nzianmei amwnpuile, nang mikphaengv tei rui, nang guang khou alei bammei tuc tei rui alung ta laa kan the.

¹⁰Nzianmei amwnpuile, nang ramzian rui ata tikahaw the. Nang ramzian hei drakhadui suangc ndeih e; nang tuang thauc rym hei maruai rym guay suangc namhgay liang e.

¹¹Amwnpuile, nang chy hei nkhuaihdui kumc e; nang baley khou guaihnoudui khatni khuaihdui nai e. Nang tuang pheybaan khou Lebanon mwn rym rui padik ge.

¹²Ai nzianmei amwnpui hei nthanmei pikwan e, raengloumei pikwan, charai tuang duipuakkai e;

¹³mi khou tei ramhbang kathau gayna thau e. puc-heithai pikwan kumc thauna gay liangmei thai nthai e.

¹⁴Khoutei henna lev nard, karym namhgaymei bang zaat guay nai e. Gumh ni agaw ni karym padikna thau e.

¹⁵Mi pikwan khou tei duipuakckai nai e, duithuak luangc e, Lebanon chyng khou rui luangc keymei duithuak luangc e.

¹⁶Dihpy pwanle, thau tho. Dihba pwanle, apikwan khou aliu guang tho; pikwan ti hei mwnrym rui tipadiklou tho. Akhaamvpu rui katuang pikwan khou guangna kathai gay liang liangmei rei tu kan di tho.